Thinjat, për pleqëri të mbarë!
Nuk është edhe një Shoqatë për Pensionistët në këtë botë shqiptare që nëpërkëmbet, por një Shoqatë ndryshe që do të kujdeset për mirëqenien dhe pleqërinë e mbarë të të gjithë atyre që do ti bashkohen këtij misioni fisnik, pas më shumë se katër dekadave të jetës së tyre që kontribuan për këtë vend!
Vështirësitë e të gjithë atyre që janë përballur nuk do pranohen për të qarë hallin ndër pensionistë, por, për t’u konsideruar si barriera burokratike që do të lindin gjatë rrugëtimit që duhet eliminuar!
Pa përjashtuar mundësinë e nismave ligjore, me ose pa thinja, anëtarët e kësaj Shoqate të zotuar për pleqëri të mbarë, do të angazhohen jo me qëllimin sa për të kundërshtuar shtetin që mohon pensionin ose vlerën e tij për një jetë dinjitoze, por, për të marrë atë që meritojnë!
Rrudhat nënkuptojnë se ke qeshur, flokët e thinjura se je shqetësuar, dhe plagët se ke jetuar! Kështu thuhej në popull për një të moshuar, por, çfarë duhet të mendoj një pensionist ndërsa vendos t’i bashkohet kësaj shoqate të sapoformuar , për “Pa Frikë” flet Presidenti i Shoqatës së pensionistëve “Thinjat”, Ilir Goci.
Zoti Goci, pse Thinjat?
Thinjat thuhet se e bëjnë një person të duket më i vjetër. Shumë njerëz shqetësohen me shfaqjen e qimeve të thinjura, veçanërisht nëse ato shfaqen në moshë të re sepse mendojnë se po plaken herët.
Deri vonë mbizotëronte edhe ideja se thinjat bëhen nga stresi! Por, shkencëtarët së fundi, pasi kanë ekzaminuar 5.000 persona, të moshës nga 30 deri në 60 vjeç kanë ardhë në përfundimin se thinjat janë të lidhura me sekretimin e melaninës dhe kjo kërkon antioksidantin më të rëndësishëm dhe më të vlefshëm që ekziston në organizëm, glutationin. Antioksidant i cili mbron nga sëmundjet më të rrezikshmesi kanceri, sëmundja e Alzheimerit dhe sëmundjet kardiovaskulare, por me kalimin e moshës, përqendrimi i tij zvogëlohet dhe një trup i zgjuar nuk i përdor rezervat e tij të substancave jetëshpëtuese për ngjyrosjen e flokëve sepse i ruan për t’u mbrojtur nga sëmundjet!
Por, mos harroni, jo vetëm ndër shqiptarë por në mesin e shumë popujve, thinjat janë konsideruar si një shenjë e rëndësishme, dhe, me shfaqjen e qimeve të para të thinjura, një burrë konsiderohet se është bërë përgjegjës për veprimet e tij dhe nuk mund të fajësojë më askënd për gabimet e tij.
Dhe, thinjatë janë sqaruar edhe në librat e shenjtë!
Jo vetëm pse studimet e kohëve të fundit flasin se shfaqja e hershme e thinjave është një shenjë e shëndetit të mirë dhe metabolizmit të shkëlqyer, por synimi i Shoqatës sonë është që më përvojën dhe këshillën profesionale të bëjmë që ky shëndet dhe ky metabolizëm të mos trazohet vetëm pse ai është pensionist; Ose, ta bëjmë të paktën më të lehtë betejën e tij për një pleqëri të dinjitetshme edhe në kushtet e Shqipërisë tonë, ku asgjë nuk funksionon, as dhe një pleqëri e mbarë e një pensionisti me kontributet e paguara sipas rregullave dhe ligjeve që i ka kërkuar ky shtet.
Këtu përfshihen të gjitha rastet që pensionistët nuk i dokumentojnë dot për vitet e tyre të punës sepse punuan në koperativë në një moshë të re ose në një minierë ku është paguar por kontributet kanë mbetur pa paguar!
Do të sqarohen patjetër edhe rastet e të përndjekurve politik që kanë punuar!
Pra, Thinjat do jenë kudo, deri në nismat ligjore në Parlament, ku nuk do të mungoj prezenca jonë.
Në kohë të vështira, flokët e thinjura të një anëtari të familjes ishin një shenjë mbrojtjeje dhe forcë. A mund të llogarisin në mbrojtje të gjithë ata anëtarë që i afrohen familjes tuaj, pra, Shoqatës?
Për kohërat e vështira që flisni Ju, kjo nxiti respektin për të moshuarit, të cilët ruheshin dhe respektoheshin veçanërisht në kohë të vështira. Këshilla kërkohej nga nga njerëzit me thinja sepse ishte shenjë e mençurisë.
Sot njerëzimi vërtetë ka nevojë për mençuri ndërsa Ne me Shoqatën Thinjat në Shqipëri, aty ku pozita e pensionistit është gjithnjë e më e vështirë vetëm jo për fajin e tij, do të mundohet të kontribuoj në vendosjen e rendit të duhur të gjërave për një epokë të re ku do të flitet për miëqenien e pensionistit dhe jo lëmoshën shtetërore, siç është sot.
Pensioni askujt nuk i falet, kontributin të cilin ai e ka paguar për moshën e tretë nuk e ka përcaktuar vetë por e ka paguar aq sa i është thënë!
Për këtë nuk meriton vetëm respekt por edhe pleqëri të mbarë!
Është mirë të shohësh thinjat në ëndërr. Thuhet se është shenjë mençurie dhe vendimi i duhur që do të merrni. Si do ta fiton betejën një pensionist si pjesë e Juaj, pra, Shoqatës Thinjat?
Thinjat janë një shenjë pozitive dhe e mirë në çdo drejtim. Është shenjë e jetës së gjatë, shëndetit dhe mençurisë. Ky është dhe synimi ynë!
Së pari, vendimi i një pensionisti për t’u bërë pjesë e Shoqatës “Thinjat” është vendim i duhur dhe këtë do ta dëshmojmë shumë shpejtë me punën tonë.
Në fillim të viteve 2000 kur u prezantua në një takim me mediat, Ambasadori i Rusisë në Tiranë, i cili po vinte nga Athina, ishte tronditë pas një vizite që i bëri Shoqatës Ruso-Shqiptare në Durrës. Po e citoj: “Ishin nja 500 budallenjë që mblidheshin dhe luanin shah e domino…”
Edhe në mendjen e shumë shqiptarëve kështu imagjinohet një shoqatë e pensionistëve.
Ne, jo për të mos e tronditur Ambasadorin e Rusisë, por Shoqata jonë do ti shërbej mirëqënies së pensionistit pa i mohuar atij të luaj shah e domino, duke kontribuar në zgjidhjen e të gjitha atyre pikëpyetjeve që janë shfaqur gjatë tranzicionit, kur një pensionist në prag të shkeljes së ditëve të fundit të punës së tij, është përballur me mungesën e dokumentimit të kontributeve për vitet e tij punës.
Këtu vlenë të theksohet rasti i 14 vjeçarëve që kanë punuar në Koperativë në kohën e diktaturës komuniste dhe sot u mohohen 4 vite pune sipas Projektligjit që pritet të diskutohet në Parlament; Ose, edhe rasti i të përndjekurëve politik që u janë paguar orët pas normës së plotësuar, por nuk figuron në dokumentet shtetërore pagesa e kontributeve për këtë shtresë që vetë regjimi e krijoi.
Kjo bëhet edhe më e papranueshme kur të përndjekurit politik sot marrin lëmoshë nga partia në pushtet ndërkohë persekutorët kanë pensionet më të mëdha që jep ky shtet; Dhe, këtu kam fjalën për padrejtësinë në gjithë 34 vjeçarin e tranzicionit që i është bërë kësaj kategorie fatkeqe!
Dhe, të mos harrojmë fasonët! Kjo kategori e shtypur me të cilën janë rritur shqiptarët gjatë gjithë tranzicionët duke parë protesta për pagat e tyre dhe trajtimin çnjerëzor, do të trajtohet me kujdes të veçantë!
Bazuar në deklaratat e tyre, niveli i pagave ishte nën çdo nivel që mund të siguroj mbijetesën e një individi, dhe jo familjes! Do të trajtohen rast pas rasti, si qëndrojnë me pagesat e kontributeve, kur ka fasonë ku janë pensionistët fason, ku kanë përfunduar; Dhe, cili do të jetë fati i atyre fasonëve që tani po përballen me falimentimin, pas zhvlerësimit të euros dhe rritjes së taksave.
Kur jemi te protestat, ditë më parë në Beograd sindikata e punëtorëve të ndërtimit kanë protestuar për punëtorët nga Shqipëria dhe Kina që marrin firmat e ndërtimit dhe i lënë anash ata nga Serbia për arsyen e vetme, mospagesën e kontributeve. E veçanta e kësaj proteste ishte se akuzohej Alabaar për projektin “Beogradi në ujë”, kompania që po ndërton Portin e ri të Durrësit! Sa do të zë vend fati i një pensionisti që jetën e kaloi në kantieret e ndërtimit shqiptar dhe jo vetëm!
Ky kujdes nuk do të mungoj jo vetëm për faktin se kjo llojë fuqie punëtore përfundon në botën e ndihmës sociale kur ai bëhet i pamundur të punoj, por mendojmë se me nismat tona ligjore do të zhdukim dhe dukurinë e mungesës së punëtorëve të ndërtuesve shqiptarë ndërkohë ata aktualisht dominojnë në tregun serb, malazez e boshnjak, për të vetmen arsye, ata bëhen konkurrencë në këtë treg sepse nuk ju paguhen kontributet.
Populli thotë: “Pleqëria është urtësi”. Megjithatë, bazuar në kërkime të shumta, shkencëtarët kanë arritur në përfundimin se të moshuarit nuk janë domosdoshmërisht më të mençur se të rinjtë dhe se në disa situata ata janë më jotolerant. A do trajtohen nga “Thinjat” fenomenet sociale që shfaqen ndër pensionistë!
Po, kohë më parë ishte profesoresha e psikologjisë dhe specialiste në kërkimin e plakjes në Universitetin privat Jakobs në Bremen të Gjermanisë, Ursula Staudinger, e cila u shpreh se të moshuarit nuk i pranojnë gjërat e reja si të rinjtë. “Ata nuk janë të hapur ndaj përvojave të reja dhe me kalimin e moshës bëhen jotolerantë. Ky kombinim nuk është një tregues i mençurisë së një personi,” thotë Staudingerova, e cila ka studiuar urtësinë që nga viti 1985.
Pa e kontestuar në asnjë moment profesoreshën e nderuar gjermane Ursula Staudinger, “Thinjat” do të mundohen që si Shoqatë të angazhojnë piskolog dhe punëtorë social në pension dhe jo vetëm, me të cilët do të organizohen seanca dhe takime me anëtarët e Shoqatës sonë, për të lehtësuar mirëpritjen e jetës në këtë moshë.
Folët për Thinjat në librat e shenjtë!
Po, sipas Biblës, Kapitulli 20 i Dhjatës së Vjetër, Lavdia për të rinjtë është forca e tyre, dhe, Nderi për të moshuarit janë flokët e thinjur.
Ndërsa në Hadithin e saktësuar nga shejkh Albani në Sahih el-Xhamia thuhet: “Mos i shkulni thinjat, sepse çdo muslimani që i zbardhet një qime në Islam, ajo do t’i bëhet dritë në Ditën e Kiametit.”
Punë të mbarë Shoqatës së pensinistëve “Thinjat”!
Falemdnerit! Shfrytëzoj rastin t’i bëjë thirrje të gjithë atyre që mendojnë se mund ta gjejnë veten në realizimin e këtyre synimeve, të enjten në orën 11:00, në Hotel Mondial, do të bëjmë prezantimin solemn të fillimit të misionit tonë.
