Thirrje mjekëve, Imzot Massafra: Mos u largoni nga Shqipëria!

Në meshën me rastin e Ditës së të sëmurave, Arqipeshkvi i Shkodrës, Imzot Angelo Massafra i bëri apel mjekëve që të mos largohen nga Shqipëria.

“Njeriu duhet të jetë më human. Në spitalet tona duhet të kemi më shumë zemër. U bëj thirrje mjekëve të mos largohen nga Shqipëria, të mos mendojnë vetëm për para.”

Nëse ata largohen në vendet e tjera, thekson Imzot Massafra kush mbetet këtu për të dhënë shërbimin e merituar.

“Kemi festuar vitin e Skenderbeut, ai ka luftuar deri në vdekje. E sot ne çfarë bëjmë, zgjedhim të ikim në vende të tjera për të qenë më rehat. Duhet të duam më shumë vendin tonë, njerëzit tonë, që të japim kontributin e duhur. Nuk është e drejtë, nuk është mire që të gjithë të lajmë duart, e ata që vuajnë çfarë të bëjnë,” thekson në mesazhin e tij,
Arqipeshkvi i Shkodrës, Imzot Angelo Massafra.