Tiranë, Samiti i dytë pa asnjë fryt për shqiptarët! U fol për të ardhmen…

Pas Samitit të Ukrainës, ky i BE-Ballkanit Perëndimor megjithëse shumë premtues ishte shumë më utopik dhe pa asnjë fryt për shqiptarët dhe jo vetëm. Ndonëse sot interesimi ishte më i madh meqë ka ndikim të drejtëpërdrejtë në mirëqenien e qytetarit, edhe sot u fol për të ardhmen, u vazhdua të flitet për 6 miliardët e BE për Ballkanin Perëndimor, madje dhe nënshtetësia shqiptare për rektoren e Kolegjit të Europës që do të hapet në Tiranë, Federica Mogherini, vetëm sa u premtua.

Po, u firmos sot nga Ministrja e Turizmit dhe Mjedisit, Mirela Kumbaro dhe Rektorja e Kolegjit të Evropës, Federica Mogherini, një memorandum mirëkuptimi për promovimin e kulturës, trashëgimisë, pasurive natyrore të Shqipërisë përmes angazhimit të studentëve të Kolegjit të Evropës, por kemi të bëjmë me një Kolegj që nuk ka filluar punë.

Samiti i Ballkanit Perëndimor me BE në Tiranë u hap nga Kryeministri Edi Rama, i cili u shpreh se Shqipëria do të punojë pareshtur për të ecur para, drejt lehtësimit të transportit dhe tregut dixhital.

Edi Rama tha se aplikimi për digjitalizimin e tregut të përbashkët do të jetë gati në qershor, duke mundësuar kështu shkurtimin e orëve të pritjes së kamionëve në dogana.

Ndërkohë Komisioneri për Zgjerimin e Fqinjësinë, Oliver Varhelyi tha se Plani i Rritjes është ambicioz dhe se ka ngelur gjysma e kohës për të vënë në zbatim këtë plan, ndërsa shtoi se BE duhet të ofrojë të gjitha përfitimet për vendet që do të bëhen anëtarë të Bashkimit Europian.

Duke hapur punimet e samitit BE-Ballkani Perëndimor, Edi Rama foli për rrugë dhe frymë të reja bashkëpunimi mes shteteve të rajonit, ndërsa bëri thirrje për të lënë pas çdo konflikt.

“Është e qartë që mundësia e re që përfaqëson plani jashtë kornizës, na sfidon në gatishmërinë për fatin e përbashkët evropian. Mundësitë mund të merren apo humben. Duhet të angazhohemi pa kufizime. Unë e pranoj se ndryshe nga Shqipëria disa vende në rajon janë në situatë komplekse për njëri-tjetrin. Disa nga vendet e rajonit përballen me çështje komplekse mes tyre, por ti lëmë pas këto për një punë bashkëpunuese e jetike që kemi para me synim për transformimin e rajonit.

Çështjet dypalëshe mbeten, por duhen zgjidhur përmes bashkëpunimit e dialogut dypalësh e jo të ndërhyjnë në këtë ushtrim të ri shumëpalësh. 10 vite me parë udhëheqësit e Ballkanit Perëndimor u takuan në zyrën e Kancelarit në Berlin për të kapur të ardhme. Bashkëpunimi është një kriter për të vlerësuar pjekurinë tonë përmes planit të ri të rritjes,” tha Edi Rama duke shtuar se mes vendeve të rajonit duhet të vendoset gjithmonë paqja, pasi në të kundërtën rrezikojnë BE.

“Në planin e rritjes në fuqi, domosdoshmëria është e qartë, ose do të marrin masat e nevojshme që të ecim përkrah njëri tjetrit ose të dështojmë. T’u japim qytetarëve tanë rrugën drejt BE. Ekonomitë tona nuk mund të lulëzojnë duke penguar lëvizjen ekonomike të njëra-tjetrës. Ose bëjmë paqe për të punuar për begatinë tonë, ose kjo mungesë do na bëjë që të humbasim paqen,” tha Kryeministri Rama duke përfunduar:

“Më vete jemi të gjithë të vegjël. Së bashku mbartim rëndësi. Si mund të bëhemi më të lirë dhe më të mëdhenj nëse kamionët tanë duhet të presin ende 26 orë në ditë. Si mund të heqim këto barriera? A mos jemi dembelë? Të çmendur? Budallenj, apo çfarë jemi? A nuk është ende e qartë për secilin prej nesh se nuk ka rrugë të shkurtër për në BE!”

Varhely: Plani i Rritjes është ambicioz, rajoni duhet të ecë para

Komisioneri për Zgjerimin e Fqinjësinë, Oliver Varhelyi tha se Plani i Rritjes është ambicioz. Nga samiti BE-Ballkani Perëndimor ka deklaruar se ka ngelur dhe gjysma e kohës për të vënë në zbatim këtë plan, ndërsa shtoi se BE duhet të ofrojë të gjitha përfitimet për vendet që do të bëhen anëtarë të Bashkimit Evropian. Varhelyi ka theksuar se Plani i Ri i Rritjes pritet të dyfishojë ekonomive e vendeve të Ballkanit Perëndimorë në 10 vitet e ardhshme.

“Procesi i zgjerimit nuk ka të bëjë me kapitujt e ndryshëm të legjislacionit, pro është proces integrimi që do të thotë se ekonomia e BP të integrohet në BE që do të thotë që edhe BE duhet të ofrojë përfitimet që sjellë anëtarësimi përpara se vendet tuaja të bëhen pjesë e BE. Kjo është ideja që ne sjellim me Planin e Rritjes.

Është plan ambicioz dhe kemi besim të plotë te vendet e Ballkanit Perëndimor që do arrini t’i merrni të mirat e këtij plani që ka mundësi të kontribuojë në dyfishimin e ekonomive të vendeve të Ballkani Perëndimor në 10 vitet e ardhshme,” tha Komisioneri për Zgjerimin duke përfunduar:

“Që të ecim përpara na duhet që rajoni të ecë përpara vetë me shpejtësi, kjo do të thotë që të arrihen rezultate për ato reforma që e bëjnë këtë plan funksional. Ky plan do të funksionojë nëse ju i zbatoni të gjitha rregullat e BE.”

Koopman: Keni vetëm një muaj kohë për të mbyllur reformat!

Drejtori i Përgjithshme për Fqinjësinë dhe Negociatat e Zgjerimit, Gert Jan Koopman, tha sot në Samitin BE-Balkani Perëndimor se duhet ritëm i lartë në punë në mënyrë që të përfitohet nga fondet e BE, madhe në mesazhin e tij u shpreh se ka mbetur vetëm një muaj kohë për mbylljen e reformave.

“Së pari udhëheqësit e pranishëm, dëshmi për angazhimin tuaj. Kjo tregon edhe ritmin e lartë që të ndodhë ndryshimi. Nuk bëhet fjalë vetëm për udhëheqësit por edhe institucionet duhet të bëjnë punët e tyre.”

Kumbaro-Mogherini firmosin memorandum

Ministrja e Turizmit dhe Mjedisit, Mirela Kumbaro dhe Rektorja e Kolegjit të Evropës, Federica Mogherini firmosën sot një memorandum mirëkuptimi për promovimin e kulturës, trashëgimisë, pasurive natyrore të Shqipërisë përmes angazhimit të studentëve të Kolegjit të Evropës me qëllim zhvillimin e bashkëpunimit në fushën e turizmit.

Sipas këtij memorandumi, Ministria e Turizmit dhe Mjedisit përmes Agjencisë Kombëtare të Turizmit, do të hartojë itineraret turistike dhe do të sigurojë udhërrëfimin turistik përmes udhërrëfyesve të certifikuar nga kjo ministri.

“Jam shumë e kënaqur që sot mirëpres në Ministrinë e Turizmit dhe Mjedisit, një mikeshë të Shqipërisë, një diplomate të klasit më të lartë që është edhe rektorja e Kolegjit të Evropës këtu në Tiranë. Jam e lumtur që ky kolegj nuk do të mirëpresë vetëm studentë shqiptarë, por studentë nga gjithë Europa dhe bashkë me Federikën kemi vendosur që këtyre studentëve t’u japim jo vetëm dijen për të cilën kolegji i Evropës është gjithë mjeshtëria që mund të imagjinohet në fushën e diplomacisë dhe të shkencave politike, por t’u japim edhe një shije të mirë të Shqipërisë sepse njëra nuk shkon pa tjetrën.

Ne do të bëjmë më të mirën që t’u japim atyre mundësinë ta vizitojnë Shqipërinë, ta shijojnë Shqipërinë edhe pse jo, të bëhen ambasadorë të ardhshëm të Shqipërisë turistike, të Shqipërisë së kulturës, të Shqipërisë europiane. Kështu sot firmosëm një marrëveshje pikërisht që të formojmë së bashku jo vetëm liderë të së ardhmes, por edhe ambasadorë të cilët do ta prezantojnë Shqipërinë me shijen e tyre personale”, u shpreh ministrja Kumbaro gjatë nënshkrimit të memorandumit.

Kolegji i Europës është duke hapur kampusin e tij në Tiranë për të nisur vitin akademik në shtator, me 31 studentët e parë nga gjithë Europa. Integrimi është një pjesë integrale e këtij programi, i cili do të jetë një realitet gjithëpërfshirës në Shqipëri dhe përfshin gjithashtu pasuritë historike, kulturore dhe natyrore të vendit.

“Është nder dhe kënaqësi për mua të jem këtu në Tiranë, por veçanërisht që po firmos këtë memorandum mirëkuptimi, i cili është një mundësi shumë e mirë, shumë e rëndësishme dhe interesante për studentët tanë dhe komunitetin e Kolegjit.

Unë jam shumë krenare që falë këtij bashkëpunimi që nënshkruam sot, do t’u ofrojmë studentëve tanë mundësinë për të eksploruar trashëgiminë kulturore, bukuritë natyrore, historinë dhe gjithçka që Shqipëria ofron. Kjo do të përmirësojë ndjeshëm procesin e të mësuarit të studentëve sepse një pjesë integrale e dijeve ka të bëjë me të kuptuarit e historisë dhe kulturës lokale dhe rajonale.

Duke qenë se do të kemi studentë nga gjithë Evropa, kjo do të jetë një mundësi e mirë që ata të kthehen në ambasadorë të Shqipërisë për vendet nga vijnë por edhe kudo në botë dhe jam e sigurt që ata jo vetëm do të mësojnë shumë, por do t’i shijojnë shumë pasuritë e mrekullueshme të këtij vendi që përmenda. Jam shumë mirënjohëse dhe dëshiroj që përveçse t’u ofrohet studentëve dhe profesorëve tanë, të eksploroj edhe vetë më shumë bukuritë e këtij vendi”, u shpreh Mogherini ndërsa ministrja Kumbaro përfundoi:

“Ju do të jeni pjesë e kësaj përvoje të re. “Albania, All u need is here” ishte slogani vitin që shkoi, kurse slogani i këtij viti do të jetë “Albania All Senses”, kështu që duhet ta shijoni dhe jetoni.”

Orët e fundit të Samitit iu kushtuan një konference të përbashkët të Kryeministrit Edi Rama me Komisionerin për Zgjerim të BE, Olivér Várhelyi, që ishin pak më të shëmtuara se ato të Samitit të djeshëm me Presidentin Volodymyr Zelenskyy.

Gjithsesi, nuk është e njëjta gjë si t’u thuash shqiptarëve se do të ndërtojmë fabrikë armatimi, dhe si t’u thuash do t’ju ndajmë 6 miliardë pjesë e së cilës do jeni ju, kur të parën e kanë shijuar një herë, ishte e hidhur dhe menduan se e groposën me iniciativën që ndërmori NATO me asgjërsimin e municioneve!

Në fund, pas dy ditë terrori policor me bllokimin e lëvizjes me automojet dhe me raste edhe në këmbë, sot kryeqytetit i kthehet liria e lëvizjes!

Rroftë Liria!