Titulli/ Ferdinand Poni, “Nderi i qytetit” të Beratit

Për kontributin e tij të shquar në funksionimin e qeverisjes vendore, sistemeve elektorale, organizimin e zgjedhjeve, hartimin e politikave në fushën e administrimit publik, territorit dhe autonomisë vendore; si një nga nëpunësit e lartë të shtetit shqiptar, për kontributin e tij të çmuar në lëvizjen opozitare dhe pluripartiake në vendin tonë dhe si qytetar i denjë i Beratit, që gezon respektin e qytetarëve të tij, Këshilli Bashkiak, i ka akorduar Ferdinand Ponit, pas vdekjes, titullin “Nderi i qytetit” të Beratit.

Në ceremoninë e zhvilluar në sallën e konferencave të Bashkisë ku merrnin pjesë të afërm të familjes Poni, përfaqësues të institucioneve vendore, kolegë dhe bashkëpunëtorë të Ferdinand Ponit në organet drejtuese të PD – së, të pushtetit qëndror dhe atij lokal, Kryetari i Bashkisë, Petrit Sinaj, dhe Nënkryetarja Afize Skëndo, i dorëzuan bashkëshortes së tij, Merita Poni, titullin e akorduar nga Këshilli Bashkiak Berat.

Bashkëshortja e tij, Merita Poni, pasi shprehu mirënjohjen e saj për vlerësimin e bërë nga ana e Bashkisë së Beratit, tha se do të donte që këto dekorata Fredi t’i merrte vetë dhe të shihte se sa shumë ju e deshët atë dhe sa shumë e vlerësuat.

“Jam shumë e prekur nga ky gjest tejet human, ku ju e shpërbleni për punën, mundin dhe sakrificat që ai bëri për qytetin e tij, duke më lumturuar mua dhe dy djemtë tanë, të cilët duhet të ndihen krenarë për veprën e babait të tyre”.

Kolegë dhe bashkëpunëtorë të Ferdinand Ponit pasi vlerësuan çmimin që qyteti i tij i jepte, sollën mbresa, kujtime dhe emocione, duke theksuar disa nga cilësitë më të mira të tij, si intelektual i klasit të parë, si një njeri i përkushtuar, këmbëngulës dhe i vendosur për ta çuar deri në fund një detyrë që i ngarkohej. Ata u shprehën se me dhënien e këtij titulli sot Ferdinand Ponit i rikthehet gjithë ajo dashuri që ai ushqeu për qytetin e tij, për vendin dhe për të gjithë njerëzit.