Trafik droge drejt Italisë, kushëriri i Saimir Tahirit dënohet me 15 vite burg!

Gjykata e Posaçme e Shkallës së Parë, GJKKO, ka dhënë vendimin përfundimtar për kusheririn e Ish-Ministrit të Brendshëm Samiti Tahiri, Moisi Habilajn, dhe financierine tij Nezar Seitin, të akuzuar për “trafikim të lëndëve narkotike” dhe “grup të strukturuar kriminal”.

Moisi Habilaj u shpall fajtor për trafik droge nga Shqipëria drejt Italisë në katër episode të ndodhura gjatë viteve 2013–2017. Ai u dënua fillimisht me 15 vite burg, por për shkak të gjykimit të shkurtuar, dënimi u reduktua në 10 vite, të cilat do t’i vuajë në një burg të sigurisë së lartë.

Ndërsa, Nezar Seiti u dënua me 12 vite burg për trafik droge, por edhe dënimi i tij u ul me një të tretën, duke u bërë 8 vite burgim.

Ndërkohë, çështja për Fatmir Minajn dhe Maridian Sulajn është pushuar, pasi ata janë dënuar më parë për të njëjtën vepër.

Ndryshe, Moisi Habilaj u bë i njohur kur u zbulua se si trafikant ndërkombëtar i drogës favorizohej me grupin e tij kriminal si kushëri i Ish-Ministrit të Brendshëm, Saimir Tahiri.