Trafik droge Shqipëri-Itali, arrestohen 5 persona. Salvini: Luftë të ashpër shitësve të vdekjes!

Shkatërrohet një grup kriminal që trafikonte lëndë narkotike nga Shqipëria drejt Italisë.

Pas realizimit të operacionit të Antimafias italiane në bashkëpunim me Policinë e Firences, mëngjesin e sotë Prokuroria italiane ka lëshuar 5 urdhër arreste: për 4 shqiptarë dhe 1 italian, në territoret e qyteteve Vlorë (Shqipëri), Siena , Brindizi e Firenze. 

Hetimet kanë zbardhur se trafikantët shqiptarë transportonin drogë të tipit marijuanë me gomone nga Shqipëria drejt italisë ku dhe janë sekuestruar rreth gjysëm tonë marijuanë.

Pas operacionit ka reaguar dhe vetë ministri i Brendshëm i Italisë, Matteo Salvini duke e bërë të qartë se do të vazhdojë një luftë e ashpër kundër shitësve të vdekjes:

“U shkatërrua në Firenze një bandë italo-shqiptare që trafikonte drogë; falë punës së policisë dhe hetuesve. Asnjë tolerancë ndaj kriminelëve, luftë të ashpër kundër shitësve të vdekjes, mbështetje maksimale për forcat tona të rendit.”