“Tryezë trepalëshe”/ Përgjigje Ramës, PD: S’jemi kundër diskutimit, çdo veprim i njëanshëm prish marrëveshjen!
Pas ftesës së Kryeministrit Edi Rama për një tryezë trepalëshe me qëllim të arritjes së konsensusit për Reformën Zgjedhore ka reaguar Partia Demokratike duke theksuar se nuk është kundër diskutimit për rishikimin e sistemit zgjedhor, por kjo kërkon një reformim të plotë të sistemit kushtetues për të cilën PD ka një propozim konkret.
“Reforma kushtetuese, ku përfshihet edhe çdo ndryshim i mundshëm i sistemit zgjedhor nuk mund të jetë një pazar i fundit të korrikut. Ky proces duhet të jetë transparent dhe vendimmarrja duhet t’u përkasë qytetarëve, përmes referendumit popullor. OSBE/ODIHR ka konfirmuar se ndryshime të tilla nuk mund të ndodhin një vit para zgjedhjeve,” thekson Partia Demokratike në reagimin e saj duke e bërë të qartë se çdo veprim i njëanshëm në këtë drejtim do të përbënte prishjen e marrëveshjes konsensuale të 5 qershorit, me pasoja për vendin dhe të ardhmen europiane të Shqipërisë.
Ndryshe, Kryeministri Edi Rama pasi takoj llumin opozitar që vet e quan “opozitë parlamentare”, në përpjekje, siç tha, të arritjes së konsesusit, edhe pse firmën mbi Marrëveshjen e 5 Qershorit e vuri eshte përfaqësuesi i këtij llumi, nuk kuptohet qëllimi i Kryeministrit që nga një Këshill Politik katërpalësh të Reformës Zgjedhore kërkon tre palë që të firmosin Marrëveshjen.
Deklaratë:
Palët në Këshillin Politik kanë firmosur marrëveshjen për Reformën Zgjedhore më 5 Qershor, me ndërmjetësimin dhe mbështetjen e SHBA dhe BE.
Partia Demokratike nuk është kundër diskutimit për rishikimin e sistemit zgjedhor, por kjo kërkon një reformim të plotë të sistemit kushtetues për të cilën PD ka një propozim konkret.
Megjithatë, kjo nuk mund të ndodhë në kushtet e kriminalizimit të parlamentit dhe të qeverisjes, në kushtet e blerjes së votës nga pushteti dhe mosndëshkimit të këtij krimi nga drejtësia. Reforma kushtetuese, ku përfshihet edhe çdo ndryshim i mundshëm i sistemit zgjedhor nuk mund të jetë një pazar i fundit të korrikut.
Ky proces duhet të jetë transparent dhe vendimmarrja duhet t’u përkasë qytetarëve, përmes referendumit popullor. OSBE/ODIHR ka konfirmuar se ndryshime të tilla nuk mund të ndodhin një vit para zgjedhjeve.
Ndaj, hapja në këtë moment, e diskutimit për sistemin zgjedhor është vetëm alibi e Edi Ramës për të vonuar kodifikimin në parlament të dakortësisë së 5 Qershorit, që është një kërkesë e Sekretarit amerikan të Shtetit, Mike Pompeo, si dhe 1 nga 15 kushtet për nisjen e negociatave të anëtarësimit me BE.
Çdo veprim i njëanshëm në këtë drejtim do të përbënte prishje të marrëveshjes konsensuale të 5 qershorit, me pasoja për vendin dhe të ardhmen europiane të Shqipërisë.
