Tuneli i Llogarasë/ Ndërtimi, Balluku: Nesër shpallet fituesi!

Sot u përmbyll faza e vlerësimeve teknike për projektin inxhinierik të Tunelit të Llogarasë ku dhe u prezantuan dy kompanitë me Zgjidhjet Teknike më të mira, njëra prej të cilave nesër do të shpallet fituese.

Ministrja e Infrastrukturës dhe Energjisë, Belinda Balluku u shpreh se janë impresionuese dhe shumë të rëndësishme të dy projektet e paraqitura.

“Nga 7 kompani në garë kanë kaluar këto dy konsorciume që kanë një eksperiencë të gjatë në fushën e ndërtimit të tuneleve dhe janë të interesuara për të ndërtuar në Shqipëri. Këto kompani janë me eksperiencë shumë të gjatë dhe fakti që janë të interesuar për të prodhuar një vepër një Shqipëri dhe që siç e pamë tek prezantimi i dytë konsiderohet një tunel i rëndësishëm dhe një nga më të mëdhenjtë në Europë, është diçka që ne na bën krenarë,” tha ministrja duke shtuar se siguria rrugore është shumë e rëndësishme:

“Tek të dy prezantimet ishte diçka që u nënvizua por edhe efiçenca e kostos së këtij projekti është shumë e rëndësishme dhe unë shpresoj që kur juria të kalojë në një diskutim bashkë me ju, më të detajuar për sa i përket projektit të merret parasysh edhe eficenca e kostos, pasi ne duhet të garantojmë sigurinë rrugore, por përmes një investimi i cili të jetë sa më efiçent”.

Padyshim edhe zgjidhjet arkitekturore, duke qenë se ajo është një zonë shumë e rëndësishme:

“Zona e Llogorasë, nuk kërkojmë thjeshtë një zgjidhje infrastrukturore por edhe një zgjidhje interesante arkitekturore, duke qenë se Llogoraja është një nga pikat tona më të rëndësishme turistike dhe për vetë faktin çfarë përfaqëson që është një Park Kombëtar i Mbrojtur i turizmit malor, gjë të cilën e kanë parasysh edhe dy kompanitë, por gjithashtu është dhe pjesa hyrëse për pjesën më të bukur të Shqipërisë që është pjesa e Jugut,” tha ministrja.