U gjet i pajetë shoferi i ministrit të Brendshëm, prokuroria sekuestron pamjet e kamerave …

Prokuroria e Tiranës ka nisur hetimet për të zbardhur ngjarjen e ndodhur paraditen e sotme, ku u gjet në automjetin e tij, me një plumb në kokë dhe pa shenja jete, Shkelzen Qordja, efektiv i gardës së Republikës dhe me funksionin e shoferit të ministrit të Brendshëm.

Nga të dhënat e para mësohet se grupi hetimor ka sekuestruar pamjet e kamerave të sigurisë, nga ku pritet të shihet nëse 31 vjeçari ka qenë i vetëm ose jo në makinë, ku ka hyrë në institucionin e Gardës së Republikës, apo nëse ka pasur persona të tjerë në vendin ku u gjet i pajetë.

Burimet bëjnë me dije se gjithashtu janë mbledhur dëshmitë nga disa prej efektivëve të Gardës së Republikës.  Mësohet se hetimet janë përqëndruar në pistën e vetëvrasjes, por nuk përjashtohen as pistat e tjera.

Policia është treguar shumë e rezervuar për ngjarjen e rëndë, ndërsa kreu i policisë së shtetit raportohet të ketë zhvilluar edhe një takim me ministrin e Brendshëm.