U gjet në kanal, vdes biznesmeni i kromit. Policia: E përplasi makina!

Një ngjarje e rëndë ka ndodhur këtë mbrëmje në Bulqizë. Biznesmeni i kromit, Murat Duriçi, është gjetur në një kanal, në gjendje të rëndë dhe ka ndërruar jetë në spital.

 Mediat lokale raportojnë se 53-vjeçari është gjetur në kanal me shenja jete nga kalimtarët, të cilët e kanë çuar në Spitalin e Bulqizës. Pasi ka marrë ndihmën e parë mjekësore, biznesmeni është nisur me urgjencë drejt Spitalit Ushtarak të Tiranës.

Ndërkohë policia ka sqaruar se biznesmeni është përplasur nga një makinë tip “Ford”, e për pasojë ka humbur jetën. 

Njoftimi i policisë

Rreth orës 21.00, në qytetin e ri të Bulqizës, shtetasi M.C, 45 vjeç, banues në Bulqizë, duke drejtuar automjetin tip ‘ford’, ka përplasur këmbësorin M. D., ku si pasojë ka humbur jetën.

 Drejtuesi i automjetit pas aksidentit ka braktisur automjetin duke u larguar nga vendi i ngjarjes, ku pas kërkimeve nga ana e policisë është bërë e mundur kapja dhe shoqërimi i tij në komisariat.

Grupi hetimor vijon hetimet për zbardhjen e shkaqeve të aksidentit.