Udhëzimi/ Ja procedurat për aplikim në projekte te Fondi i AAPSK, nga shoqëria civile dhe OFJ
Organizatat e shoqërisë civile dhe jofitimprurëse që merren me dhënien e ndihmës për personat që preken nga krimi i organizuar mund të paraqesin pranë Agjencisë së Administrimit të Pasurive të Sekuestruara dhe të Konfiskuara, AAPSK, kërkesat për financimin e projekteve.
Udhëzim i Ministrisë të Brendshme i botuar në fletoren zyrtare përcakton rregullat dhe procedurat që duhet të zbatojnë aplikuesit për të përfituar nga fondi i posaçëm për parandalimin e kriminalitetit.
Në udhëzim thuhet se kërkesat për financim duhet të përmbajnë të dhëna të qarta për qëllimin, objektivat specifikë, veprimtaritë që do të kryhen për realizimin e tyre, buxhetin dhe rezultatet e synuara. Në vlerësimin e kërkesave për financim mbahet në konsideratë edhe impakti social i projektpropozimit dhe rëndësia në parandalimin e kriminalitetit.
Projektet e shpallura fituese do të financohen për vlerën e plotë dhe financimi do të bëhet në raport me ecurinë e realizimit të tyre dhe me respektimin e procedurave ligjore përkatëse për kryerjen e pagesave.
Përfituesit e këtij fondi kanë detyrimin e raportimit pranë AAPSK-së për mënyrën e përdorimit të tij, çdo 3-muaj, duke filluar nga marrja e së drejtës për financim. Raportimi do të bëhet me shkresë zyrtare dhe përmban: vlerën e përfituar dhe të mbetur; fondin e përdorur; mënyrën e përdorimit si dhe afatin e përfundimit të projektit. Projektet e shpallura fituese dhe fondi i akorduar do të bëhen publike në faqen zyrtare të Ministrisë së Brendshme dhe të AAPSK-së.
Udhëzimi përcakton se kërkesa për aplikim mund të paraqitet edhe nga institucionet qendrore dhe vendore.
Dokumentet që duhet të paraqesin organizatat e shoqërisë civile apo jofitimprurëse:
– vendimin e gjykatës së rrethit gjyqësor për regjistrimin e aplikuesit;
-dokumentin që vërteton se subjekti aplikues nuk është në ndjekje penale dhe nuk është dënuar me vendim të gjykatës së formës së prerë;
-dokumentin që vërteton se subjekti aplikues nuk është në proces falimentimi dhe/ose likuidimi;
-kopje të pasqyrave financiare të tri viteve të fundit, të audituara dhe të depozituara në organet tatimore;
-dokumenti që vërteton se subjekti aplikues ka paguar rregullisht sigurimet shoqërore për stafin e punësuar;
-dokumenti që vërteton se subjekti aplikues nuk ka detyrime tatimore, lëshuar nga organet tatimore;
-licencë/leje për ushtrim veprimtarie, vetëm në rastet kur aktiviteti/veprimtaritë e kërkuara për t’u financuar nuk mund të kryhen, pa zotëruar një licencë të akorduar nga autoritetet shtetërore, në përputhje me legjislacionin në fuqi./Monitor/
