Unaza e Re/ Policia, fletëthirrje për banorët që protestojnë

Katër prej banorëve të prekur nga projekti Unaza e Madhe që protestojnë te Unaza e Re, u është dëguar fletëthirrja për tu paraqitur në Komisariatin Nr 4.

Në komisariat u paraqitën Artan Manushaqe, Gëzim Sadikaj, Lindita Protoduari dhe Altin Qeku.

Sipas banorëve shoqërimi i tyre është bërë pa të drejtë, dhe po kryhet për të dobësuar rezistencën e protestës së tyre në zonën e Unazës Re.

“Unë protestoj për shtëpinë time. Aty protestojnë me qindra qytetarë ndërsa mua më kanë hapur 2 dosje dhe kjo është e treta për tubim të paligjshëm. Edi Rama ta harrojë  nuk ka gjykatë që të na gjykojë pse ne po protestojmë për pronën. Ne na kërcënojnë çdo natë,” tha njëri prej banorëve.

Përveç tjerave banorët e Unazës Re u pyetën dhe për marshimin e bërë një muaj më parë pranë shtëpisë së kryeministrit Edi Rama.

“Me urdhra politikë janë shoqëruar banorë me arsyetimin për të dhënë fakte e rrethana nga marshimi që është bërë në Surrel drejt Dajtit. Këto shoqërime janë bërë me urdhër të Ramës”.  Me banorët e Unazës Re tek komisariati Nr.4 ishte dhe deputeti i Partisë Demokratike, Klevis Balliu, i cili fletëthirrjet për të dëshmuar, i ka quajtur me urdhër të kryeministrit Rama.