Ushtria e Taiwanit gjen mbetjet e balonës kineze

Ushtria e Taiwanit ka bërë të ditur sot se ka gjetur mbetjet e balonës kineze të spiunazhit.

Mëngjesin e sotëm, forcat taiwaneze kanë vërejtur te ishulli Dongjin një objekt të paidentifikuar se si po bie nga qielli, dhe më pas kanë gjetur mbetjet e balonës,” raporton Agjencia e lajmeve Reuters.

Objekti është me diametër rreth 1 metër, me instrumente të shënuara në gjuhën kineze, që përdoren në Kinë, por jo edhe në Taiwan, thuhet në komunikatën e forcave taiwaneze.

“Hetimi paraprak ka konfirmuar se janë gjetur mbetjet e pajisjes, me të cilën janë marrë departamentet kompetente, për ti studiuar në detaje,” thekson Ushtria e Taiwanit.

Një pjesë e madhe e balonës kineze të cilën e ka rrëzuar ushtria amerikane më 4 shkurt është nxjerrë të martën nga Oqeani Atlantik afër bregut të Karolinës së Jugut.

Ndryshe, Dongjin ndodhet në veri të ngushticës së Taiwanit, kalim ky shumë i rëndësishëm për anijet kineze që lëvizin nga provinca lindore Gjegjijang drejt jugut.