“Valdrin Pjetri nuk shkoi 8 vjet”/ Edi Rama: Air Albania nis fluturimet drejt Italisë!

Pas Kërkesës së Partisë Demokratike për pastërtinë e figurës së Valdrin Pjetrit drejtuar Prokurorisë së Përgjithshme, pasi ka indicie dhe dëshmi publike se ai nuk mund të ushtrojë funksion publik për shkak të ligjit të dekriminalizimit ndërsa jepen dëshmi se në vitin 2001-2002 Pjetri ka qenë i arrestuar në Itali dhe më pas është dëbuar, si dhe nga verifikimi i të dhënave të sistemit TIMS rezulton se shtetasi Valdrin Pjetri nga periudha 2002 – 23.03.2010 nuk ka udhëtuar në drejtim të Italisë, Kryeministri Edi Rama bënë publik lajmin se në fillimvjeshtë, Air Albania nis fluturimet me Italinë.

“Nisin me Italinë në fillimvjeshtë, fluturimet e kompanisë kuqezi drejt qiejve të Europës. Hë tani jepini, filloni shani e përqeshni sa të doni, si zakonisht. Po të paktën, futeni mirë në kokë, se kur unë them KJO DO BËHET, është vetëm çështje kohe, pune, mundimi e durimi, por fjalën time s’e merr kurrë,” thekson Edi Rama përmes rrjetit social Facebook pa sqaruar pse sërish kandidon në Veri një person me precedent penal, dhe si është e mundur që sapo kalon Fushë Krujën nuk gjen dot një bashkëpunëtor që nuk e ka shiju burgun.

Kjo është dhe arsyeja sipas Kryeministrit Edi Rama që shpreh bindjen:

“Prandaj BESIM dhe DURIM miq, se do t’i bëjmë, së bashku, të tëra ato që kemi në dorë t’i bëjmë për Shqipërinë që duam.”

Ja statusi i plotë:

AIR ALBANIA DREJT QIEJVE TË EUROPËS

Nisin me Italinë në fillimvjeshtë, fluturimet e kompanisë kuqezi drejt qiejve të Europës

Hë tani jepini, filloni shani e përqeshni sa të doni, si zakonisht. Po të paktën, futeni mirë në kokë, se kur unë them KJO DO BËHET, është vetëm çështje kohe, pune, mundimi e durimi, por fjalën time s’e merr kurrë era.

Dhe mos e harroni, se nga e thëna në të bërë është në mes një det i tërë; herë i ngushtë e herë i gjerë, herë i qetë e herë me trazime që të vonojnë; nganjëherë edhe me furtuna e tallaze që të ndryshojnë trajektoren, po jo qëllimin nëse nuk dorëzohesh.

Prandaj BESIM dhe DURIM miq, se do t’i bëjmë, së bashku, të tëra ato që kemi në dorë t’i bëjmë për Shqipërinë që duam