Varadkar: BE t’ia heqë masat Kosovës! Kurti: Asociacioni s’është prioritet i normalizimit!

Kryeministri i Irlandës, Leo Varadkar, pas takimit me homologun e tij kosovar e ka bërë të qartë se shteti i tij është për heqjen e masave ndaj Kosovës ndërsa Kryeministrin Albin Kurti tha se Asociacioni i komunave me shumicë serbe nuk është top-prioritet i normalizimit të marrëdhënieve ndërmjet Kosovës dhe Serbisë, por është Marrëveshja Bazë.

“Qëndrimin i qeverisë irlandeze është se masat kufizuese që i janë vënë Kosovës nga Bashkimi Evropian duhet të hiqen dhe këtë pozicion ia kam bëra me dije edhe kryeministrit Kurti,” tha Varadkar ndërsa foli edhe për zgjedhjet në katër komunat veriore si dhe për themelimin e Asociacionit.

“Është rëndësi që komunat t’i zgjedhin kryetarët në mënyrë demokratike dhe ata t’i përfaqësojnë njerëzit që jetojnë në ato zona. Ne duam të shohim themelimin e Asociacionit por kjo duhet të bëhet në koordinim me ato zona. Megjithatë, nuk dua të shoh krijimin e një mikro-shteti brenda Kosovës, sepse kjo nuk do të ishte diçka e dobishme për të ardhmen,” tha Kryeministri i Irlandës duke u zotuar se vendi i tij do të ndihmojë integrimin e Kosovës.

“Irlanda është ndër vendet e para që e ka njohur pavarësinë e Kosovës dhe jam krenar për kontributin që anëtarët e ushtrisë tonë e japin këtu si pjesë e KFOR-it dhe irlandezët civil si pjesë e EULEX-it. E ardhmja e Kosovës është në Bashkimin Evropian dhe në Këshillin Evropës, andaj më shumë ëndje do ta përkrahë Kosovën për anëtarësim sivjet në KE, por edhe të fillojmë procesin e negociatave me BE-në për anëtarësim atje,” tha Leo Varadkar duke vlerësuar se Kosova po tregon zotimin për vlerat evropiane.

“Ju keni harmonizuar politikat e sigurisë me ato të BE-së dhe e gjithë kjo është shumë me rëndësi, pasi ndikon në vlerësimin tonë në të ardhmen. Trajtimi i të drejtave të minoriteteve gjithmonë është një matje shumë e mirë për zotimin e një shteti për demokraci. Dialogu mes Kosovës dhe Serbisë është jetik për të arritur harmoni dhe për të pasur një zhvillim edhe në Kosovë edhe në Serbi. Ky vit duhet të jetë vit i stabilizimit dhe nuk dua të shoh kthim të skenave të dhunshme si ato në maj e shtator,” tha Varadkar me shpresën se 2024 do të jetë viti kur Kosova do të bashkëngjitet në Këshillin e Evropës.

“Ne mund të ndihmojmë në anëtarësimin e Kosovës në BE, sepse shpesh shtetet e tjera e shohin Irlandën si një model që duhet ndjekur. Mendoj se mund të punojmë në këtë aspekt së bashku. Qeveria irlandeze dhe sistemi irlandez është i gatshëm të ndihmojë Kosovën.”

Ndërsa, Kryeministri Albin Kurti nga ana e tij theksoi se mes pasigurive globale, kërcënimeve për kontinentin evropian, Irlanda qëndron si një testament i forcës së unitetit të aleancës dhe angazhimit të qëndrueshëm për përparim.

Me këtë rast Albin Kurti sqaroi se Asociacioni i komunave me shumicë serbe nuk është top-prioritet i normalizimit të marrëdhënieve ndërmjet Kosovës dhe Serbisë, por është Marrëveshja Bazë, dhe të gjithë ata që e nxjerrin Asociacionin nga paketa, sipas tij, i bëjnë dëm Kosovës.

Më 26 tetor të vitit të kaluar, përsëriti Kryeministri i Kosovës edhe para homologut të tij irlandez, se ishte i gatshëm të nënshkruajë një paketë, ku ishin të përfshira Marrëveshja Bazë, Aneksi i Zbatimit dhe draftstatuti euroamerikan për Asociacionin, por një gjë e tillë ishte refuzuar nga pala serbe.

“Unë më 26 tetor, dy ditë pasi i kam dhënë vërejtjet e mia kapitale për draftstatutin e Asociacionit si propozim euroamerikan kam ofruar që ta nënshkruajmë një paketë, ku është Marrëveshja Bazike, Aneksi i Zbatimit dhe ky draftstatuti i Asociacionit, për të cilin i kam pasur vërejtjet, por aty në Bruksel mu tha se është  çështje urgjente, pasi agresioni rus në Ukrainë nuk po përfundon dhe një luftë e re në Lindjen e Mesme nisi, andaj është e domosdoshme të bëjmë shpejt. Mirëpo oferta ime gjeneroze për nënshkrim u refuzua nga pala serbe,” tha Kurti në konferencën e përbashkët për media me Varadkar ndërsa sqaroi dhe qëndrimin e shprehur përmes rrjeteve sociale lidhur me gatishmërinë e tij për të shkruar një draft për Asociacionin.

“Në atë postim kam thënë se unë mund ta shkruaj një draftstatut, meqenëse ndërmjetësi Lajçak tha se është  çështje e brendshme e Kosovës. Atëherë pse kemi diskutuar për Asociacionin dy vjet në Bruksel? Paskemi humbur kohë. Nëse është  çështje e brendshme që u tha për herë të parë, sepse nuk është thënë deri në dhjetor, unë mund ta shkruaj. Pra nuk i kam dhënë premtim tjetrit, por kam shprehur aftësi vetjake për ta shkruar dhe le ta diskutojmë,” tha Kryeministri i Kosovës duke kërkuar që të mos ngatërrohet hierarkia e gjërave, sepse fillimisht është Marrëveshja Bazë, Aneksi i zbatimit dhe vetëm më pas mund të flitet për Asociacionin.

“Të gjithë ata që e nxjerrin Asociacionin nga paketa i bëjnë dëm Kosovës. Nuk mund ta nxjerrësh nga paketa e ta bësh prioritet për nga koha ose në qendër për nga hapësira e tryezës. Asociacioni nuk është top-prioriteti i normalizimit, është Marrëveshja Bazike, andaj të gjithë kolegët e mi jo vetëm në Kosovë, i lus të mos e nxjerrin nga paketa draftstatutin apo Asociacionin si një  çështje. Lexoni gjashtë fjalitë e para në Marrëveshjen Bazike dhe 11 nenet. Vetëm në nenin e 7 dhe të 10 mund të thuhet se kemi referencë tek  çështja e komunitetit serb, për të cilin unë dua që t’i ketë të gjitha të drejtat,” tha Albin Kurti duke renditur të drejtat që i gëzon komuniteti serb në Kosovë ndërsa shtoi se pajtohet edhe me Kryeministrin irlandez se respektimi i të drejtave të minoriteteve gjithmonë është një matje shumë e mirë për demokracinë e një shteti.

Në fund, Kryeministri i Kosovës, Albin Kurti, edhe me këtë rast kërkoi që krimineli Milan Radoiçiç t’i dorëzohet organeve të drejtësisë dhe jo të sillet i lirë në shtetin serb.

Ndryshe, Kryeministri i Irlandës, Leo Varadkar, vazhdoi vizitën zyrtare në Kosovë me një takim me Presidenten Vjosa Osmani.