Vasili akuza Ramës dhe Veliajt: Jeni mashtruesa, 100 milionë i keni harxhuar për portale…

Kreu i Grupit Parlamentar të LSI-së, Petrit Vasili, akuzoi Kryeministrin Edi Rama dhe kryebashkiakun e Tiranës, Erjon Veliaj, se mashtrojnë kur thonë se nuk kanë lekë për ndërtimin e një teatri të ri.

Në këtë mënyrë, Vasili është rreshtuar në krah të artistëve dhe aktorëve, që kundërshtojnë projektin Rama-Veliaj.

Vasili shkruan në Facebook se vetëm për portale pa asnjë funksion kjo qeveri ka haxhuar 100 milionë euro.

Postimi i Petrit Vasilit

Kryeministri, që badërdisi mbi 100 milion euro me portale s’ka lekë për teatrin. Kriminale.

Kryeministri megjithë Bashki e Ministri bëjnë në mënyrë të pështirë viktimën sikur s’ka para’, vetëm e vetëm që të grabisin tokën e Teatrit Kombëtar dhe ta shkatërrojnë atë.

Këta janë thjesht dhe vetëm kriminelë të artit dhe kulturës së Shqipërisë, pasi kërkund nuk është parë e dëgjuar që krenaria e artit të një vendi të trajtohen si armiq nga qeveria e tyre vetëm sepse mbrojnë artin.

Ne po përjetojmë tragjikisht inkuizicionin e binomit shkollëpakë dhe hajdutë, që po bie si sopatë mbi Teatrin Kombëtar dhe aktorët e shkëlqyer të tij.

Sa për paratë, po ju sjell vetëm fakte se ç’badërdi kanë bërë këta duke bërë lekët rrush e kumbulla me portale e dixhitalizimi koti.

E kanë pohuar vetë që kanë grirë mbi 100 milion euro për to dhe të gjithë e kuptojnë menjëherë që vetëm me to do kishim bërë nja 5 teatro kombëtare ultra moderne.

Dhe sot qajnë e lajnë se gjoja s’kanë para.

Janë mashtrues e kusarë dhe pikë.

Ja fakti i pohuar me gojën e tyre:

Në nëntor të 2016 Ministrja e Inovacionit Harito deklaronte përpara Komisionit Parlamentar te Ligjeve:

‘Vetëm për të pasur një ide për vlerën e kësaj, në tri vitet e kaluara për infrastrukturën dixhitale janë shpenzuar nga shteti shqiptar, dhe këtë e keni edhe te APP, nga institucionet e ndryshme, jo vetëm institucioni që drejtoj unë, janë investuar nga buxheti rreth 100 milionë euro’.