Vasili mbron Naçon dhe Haxhinaston: Nuk kemi vendim për bojkot…
Kryetari i Grupit Parlamentar të LSI-së Petrit Vasili ka mohuar sot që kjo forcë politike të ketë marrë vendim për të bojkotuar Kuvendin apo Komisionet Parlamentare. Reagimi erdhi një ditë pasi dy deputetë të LSI-së, ish-ministrat, Nasip Naço dhe Edmond Haxhinasto, nuk u larguan nga komisionet ku bëjnë pjesë, në momentin që deputetët e opozitës ikën.
“LSI nuk ka bojkotuar asnjëherë Parlamentin që nga dita e parë. Madje brenda Frontit Opozitar ka pasur dakordësi me qëndrimin tonë që LSI të ishte prezent në komisionet parlamentare.
Anëtarët e LSI-së vazhdojnë të jenë në komisione dhe do të vazhdojnë të jenë. Madje edhe PD u kthye në komisione. Unë jam Kryetar i një Komisioni Parlamentar, dhe e kam drejtuar çdo ditë atë.
Madje njëherë që nuk u zhvillua mbledhja e Komisionit të Shëndetësisë dhe Çështjeve Sociale, kjo ndodhi edhe për shkak të mungesës së deputetëve të Partisë Socialiste. Kështu që dua të theksoj edhe njëherë se nuk ka pasur ndonjëherë bojkot.
Të gjejnë në media për ndonjë intrigë tjetër të pyesin Edi Ramën se çfarë porosie bajate t’u japi sërish dhe të shkruajnë prapë”, tha Kryetari i Grupit Parlamentar të LSI-së, Petrit Vasili.
