Vdiq Ballkani i Hapur, Rroftë Procesi i Berlinit!

Le Roi mort, vive le Roi! Kjo shprehje u përdor në vitin 1422 kur  u shpall vdekja e mbretit Charles VI dhe u shpall automatikisht Charles VII për mbretin e Anglisë. Ngjashmëria e Ballkanit të Hapur me një mbret ishte vetëm në kokën e ideatorëve Vuçiç-Rama ndërsa ajo e Procesit të Berlinit me rastin e vitit 1422 deri sot ishte e pamundur, por sot përveç se reale, u bë edhe komike!

Liderët e Kosovës, Bosnje Hercegovinës dhe Malit të Zi kishin arsye ti gëzohen aktit final të firmosjes së tre marrëveshjeve në kuadër të Samitit të Procesit të Berlinit, për njohjen reciproke të letërnjoftimeve, të diplomave universitare dhe të kualifikimeve profesionale, por jo edhe ata të Shqipërisë, Maqedonisë së Veriut dhe Serbisë, të cilët me pompozitet, pasi “hapën” Ballkanin, firmosën marrëveshje për njohjen e letërnjoftimeve dhe diplomave, dhe sot diplomat vazhdojnë të qajnë duke parë nga Marrëveshja e lënë në letër nga trekëndëshi i Ballkanit Beograd-Shkup-Tiranë!

Charles  VII u bë mbret kur ishte vetëm 11 vjeç, dhe deri në moshën e pjekurisë punët e Mbretit i bënte xhaxhai i tij, Philipi; Sot, Presidenti i Serbisë, Aleksandar Vuçiç u soll pikërisht si një 11 vjeçar! Ai shmangu këtë ceremoni sepse do të firmoste edhe një herë arritjen e Ballkanit të tij të Hapur i cili u mbyll ende pa u hapur, dhe duke mos i munduar as egoja serbe përveç se i papjekur, nuk vajti fare në Berlin!

Kryeministri i Maqedonisë së Veriut, Zoran Zaev, nuk u turpërua sepse si njeri me fat nuk është më Kryeministër ndërsa me Kryeministrin e Shqipërisë, Edi Rama, situata ndryshon. Si njeri i pafytyrë, ai përveç se firmosi nuk e kishte për turp ta thotë se është shumë e rëndësishme tani që gjithkush është i përfshirë, në kuadër të tre marrëveshjeve.

“Këto marrëveshje ishin të bllokuara. Kancelari punoi fort për të bindur gjithkënd për ti nënshkruar dhe sot patëm 3 nënshkrime të rëndësishme. Është shumë e rëndësishme tani që gjithkush është i përfshirë, në kuadër të 3 marrëveshjeve. Sigurisht, tingëllon pak e çuditshme, apo paksa mënjanuese për popullin e Kosovës që ndërkohë që ata që bënë një marrëveshje për ID për të lëvizur lirisht, nuk mund të lëvizin në BE. Presim me padurim që kjo të zgjidhet sa më shpejt të jetë e mundur,” tha Edi Rama me pamjen nga Novi Sadi dhe Aleksandar Vuçiçi, aty ku lindi ky turp ballkanik që sot u shua, Ballkani i Hapur.

Kështu, koha e Ballkanit të Hapur skadoi ende pa u kuptuar autori; Derisa Aleksandar Vuçiç mburrej se ishte ideja e tij, Edi Rama duke tërhequr zvarrë Zoran Zaevin autorsinë e kërkonte te treshja, që sot është vetëm e dështuar.

Për ata që dyshuan, Ballkani i Hapur ishte i papjekur dhe Mbret nuk u bë kurrë meqë sot mori fund si aventurë e dy batakçinjëve në politikë; Ndërsa Procesi i Berlinit do ngelet ashtu siç e kishin kuptuar të gjithë të tjerët, Mbretin e qetësimit të Ballkanit!

Në fund, Charles VII u çmend në moshën 36 vjeçare, por këtu historia nuk përsëritet dhe nuk cenon asnjërin prej krijuesve të Ballkanit të Hapur!

Kjo, ka kohë që ka ndodhë!