Vendet më të shtrenjta dhe më të lira për hotele e restorante: Shqipëria sa 52% e mesatares së BE

Qoftë për pjatat e famshme të djathrave në Francë apo për pjatat me makarona në Itali, Europa u ofron turistëve një gamë ushqimesh të njohura në mbarë botën. Çmimet në hotele dhe restorante ndryshojnë nga një vend në tjetrin në kontinent, por ku shkon më larg paraja juaj?

Europa është shtëpia e shumë prej destinacioneve turistike më ikonike në botë, që nga pamjet kodrinore të Lisbonës deri te Kulla Eifel në Francë.

Megjithatë, kostoja e një nate qëndrimi në kontinent mund të jetë e kripur — çka do të thotë se udhëtarët duhet të jenë të kujdesshëm kur kërkojnë oferta.

Për ata që duan të krahasojnë kostot mes vendeve, treguesi i nivelit të çmimeve i Eurostatit për restorantet dhe hotelet mund të jetë i dobishëm.

Mesatarja e BE-së është vendosur në 100. Kjo do të thotë se, nëse restorantet dhe hotelet kushtojnë mesatarisht 100 euro në BE, treguesi tregon sa do të kushtonte e njëjta “shportë” shërbimesh në secilin vend.

Një tregues mbi 100 do të thotë se një destinacion është më i shtrenjtë se mesatarja e BE-së, ndërsa një tregues nën 100 tregon se ai është më i lirë se mesatarja.

Ky është një tregues indeksi, jo një vlerë monetare reale, që do të thotë se shërben vetëm si pikë reference për krahasim.

Sipas të dhënave më të fundit nga Eurostat, Zvicra është vendi më i shtrenjtë për restorante dhe hotele mes 37 vendeve Europiane.

Një shportë standarde e këtyre shërbimeve kushton 171 euro në Zvicër, ose 71% më shumë se mesatarja e BE-së.

Në skajin tjetër qëndron Maqedonia e Veriut, vendi më i lirë, me çmime 50% nën mesataren e BE-së, ose rreth 50 euro. Shqipëria renditet e parafundit, me çmime 52 pwr qind nën mesataren e Bashkimit Europian.

Mes vendeve të BE-së, Danimarka është më e shtrenjta për restorante dhe hotele. Një shportë standarde kushton aty 148 euro, ose 48% mbi mesataren e BE-së.

Bullgaria është vendi më i lirë në BE, me një shportë shërbimesh që kushton gjithsej 53 euro.

Dallime rajonale

Vendet nordike janë përgjithësisht më të shtrenjta për restorante dhe hotele, ndërsa edhe vendet e Europës Perëndimore priren të jenë mbi mesataren.

Irlanda, Holanda, Belgjika, Gjermania dhe Franca janë të gjitha në ose mbi pragun referues prej 100 eurosh të BE-së.

Në të kundërt, Europa Lindore dhe Ballkani ndodhen dukshëm nën mesataren prej 100 eurosh të BE-së.

Në Europën Jugore, Portugalia, Spanja dhe Greqia janë dukshëm më të lira se mesatarja e BE-së, megjithëse Italia spikat si përjashtim./Euronews/Monitor/