Vendimi, GJKKO: Arrest me burg për Ish-Ministrin e Mjedisit, Lefter Koka!
Gjykata e Posaçme kundër Krimit të Organizuar dhe Korrupsionit, GJKKO, ka caktuar sot masën “arrest me burg” për Ish-ministrin e Mjedisit, Lefter Koka me akuzën për shpërdorim detyre në lidhje me abuzimet me inceneratorët.
Mësohet se Ish-Zyrtari i lartë i PS dhe LSI-së, Lefter Koka ka mohuar 3 akuzat që rëndojnë ndaj tij në lidhje me çështjen e abuzimit me inceneratorët. “Kam zbatuar ligjin” është shprehur Koka.
Ndërkohë që Lefter Koka ngelet në brug, në kërkim janë shpallur biznesmenët Klodian Zoto dhe Stela Gugallja ata që kanë marr lekët për ndërtimin dhe siç supozohet i kanë dhënë ryshfetin prej 3.6 mln euro Ish-Ministrit, shumë e cila, sipas avokatit të Lefter Kokës nuk u përmend sot në seancë.
Ndryshe, SPAK përmes një njoftimi zyrtar ka bërë të ditur se Lefter Koka akuzohet për veprat penale “Shpërdorimi i detyrës”, “Korrupsioni aktiv i funksionarëve të lartë shtetërorë ose i të zgjedhurve vendorë”, “Korrupsioni pasiv i funksionarëve të lartë shtetërorë ose i të zgjedhurve vendorë” dhe “Pastrimi i produkteve të veprës penale apo i veprimtarisë kriminale”.
