Vendimi, GJKKO: Saimir Tahiri dënohet 3 vite e 4 muaj burg

Gjykata e Posaçme e Apelit kundër Korrupsionit dhe Krimit të Organizuar, GJKKO ka dënuar sot me 3 vite e 4 muaj burg Ish-Ministrin e Brendshëm, Saimir Tahiri.

Gjatë fjalës se tij kreu i trupës gjykuese deklaroi se provohet lidhja e Tahirit me Moisi Habilajn dhe Artan Habilajn. Po ashtu gjykata tha se është verifikuar se Tahiri ka përfituar shërbime të padrejta dhe shpërdorimi i detyrës ka dëmtuar shtetin.

Saimir Tahiri, u dënua me 5 vite burg, për shkak të gjykimit të shkurtuar, është dënuar me 3 vite e 4 muaj burg. Pasi të firmosë urdhrin e Gjykatës, me pranga në duar Saimir Tahiri do të dërgohet në Burgun 313.

Kundër këtij vendimi, Gjykata tha se mund të bëhet rekurs në Gjykatën e Lartë.

Ndryshe, Prokuroria e Posaçme Kundër Korrupsionit ka kërkuar dënimin me 12 vite burg për ish-ministrin dhe ish-drejtorin e Policisë së Vlorës, Jaeld Çelën, që për shkak të gjykimit të shkurtuar, ky dënim ishte 8 vite burg për të dy ish-zyrtarët për lidhjet e dyshuara me të ashtuquajturin “Grupi i Habilajve”, vëllezërit e akuzuar për trafik të sasive të mëdha të marijuanës nga Shqipëria drejt Italisë.

Ish-ministri i Brendshëm u vu nën hetim nëntorin e vitit 2017, pasi autoritetet italiane goditën organizatën e vëllezërve Habilaj. Në përgjimet e kryera, emri i zotit Tahiri përmendej disa herë në bisedat mes trafikantëve. Prokuroria kërkoi me urgjencë arrestimin e tij, por shumica e majtë, refuzoi kërkesën duke pretenduar se ajo nuk kishte paraqitur asnjë prove. Në maj të vitit 2018, zoti Tahiri dha dorëheqjen nga mandati i deputetit. Menjëherë më pas prokuroria kërkoi sërish arrestimin e tij. Zoti Tahiri kaloi një periudhë të shkurtër në arrest shtëpie, derisa më pas Gjykata e Apelit lejoi hetimin e tij në gjendje të lirë, hetim i cili u mbyll në vitin 2019