Vendimi për targat, krimineli Aleksandar Vuçiç kërcënon me luftë!
Mirë se vini, miq të dashur! Kështu e priti në orët e paraditës, Presidenti i Serbisë, Aleksandar Vuçiç, një delegacion biznesi nga SHBA, i pari pas 20 viteve që viziton shtetin serb, për të kërcënuar në orët e pasdites me ministrin e Mbrojtjes, Milosh Vuçeviç, siç i quajti, “padronët e pavarësisë së Kosovës” me ushtrinë serbe që është në gatishmëri lufte me urdhër të po këtij Vuçiçi, që për shqiptarët është po ai krimineli i qeverisë Milosheviçit nga vitet ’90!
“Me urdhër të Presidentit Aleksandar Vuçiç, Ushtria e Serbisë është në nivelin e gatishmërisë për luftë, për shkak të situatës në Kosovë,” tha ministri i Mbrojtjes i Serbisë, Milosh Vuçeviç, për TV Happy si pjesë e fushatës medatike në prag të zbatimit të vendimit të Qeverisë së Kosovës për targat e makinave serbe në Veri duke qenë dhe shteti i vetëm në botë që me targat e makinave merret ministria e Mbrojtjes!
Por Vuçeviç duke qenë i angazhuar për 72 orë në media, nxori nga goja atë që nuk ka nxjerr as krimineli Slobodan Milosheviç në vitet e tij të delirit:
“Serbia nuk do destabilizim të rajonit. Nuk do, zoti na ruajt, konflikte ose luftë. Ne kemi luftuar më shumë se sa duhet në shekullin XX. Por administrata në Prishtinë duhet ta dijë se dëshira jonë për paqe, dialog e kompromis nuk është shenjë dobësie. Dhe, ky nuk është kërcënim për askënd, ne nuk luajm me këto gjëra. Këto nuk janë lojëra me luftë! Por ky është mesazh i një shteti të përgjegjshëm,” tha Vuçeviç për Blic TV ndërsa në vërejtjen e drejtueses së emisionit se Serbia nuk mund të bëjë asgjë sikur edhe të përshkallëzoj situata kur KFOR-i është aty, ai u përgjigj me gjuhën që nuk e kishte dëgjuar asnjë serb që nga lufta e dytë botërore me gjeneralin çetnik Drazha Mihajloviç:
“Lërini ato fjalë, nuk mundemi! Mundemi! Nuk duam të shkojmë drejt përshkallëzimit, por Serbia ka përgjigje të përgatitur për të gjitha skenaret e mundshme,” kërcënoi ministri i Mbrojtjes i Aleksandar Vuçiçit, edhe NATO-n në emisionin “Jasno. Kao dan!”/ lexo shqip: “E qartë. Si dita!”/ në Blic TV vetëm pak çaste para se të fillonte zbatimi i vendimit të Qeverisë së Kosovë për targat dhe disa orë pasi nga TV Pink u kishte dërguar mesazh të qartë atyre që mbështesin pavarësinë e Kosovës:
“Problemi është se padronët e pavarësisë e Kosovës konsiderojnë se janë legale dhe legjitime aksionet e Kosovës për targat, dhe që në territorin e tyre të organizojnë aktivitete policore, për mbledhjen e taksave etj. Ne kemi problem ta kuptojmë se si i sheh KFOR-i disa çështje. Por ai nuk mund të heshtë nëse fillon dhuna ndaj serbëve ose që reagimin serb ta karakterizoj si përshkallëzim dhe të nis aksionin kundër serbëve dhe ata që e nxitën,” tha ministri i Mbrojtjes i Serbisë, Milosh Vuçeviç, duke mos dhënë shpresë për atë që do ndodhë në orët në vijim, por as negociatat në Bruksel kur pala kosovare ka kriminel të këtij kalibri.
Ndryshe nga ky i çmendur, shefi i tij Aleksandar Vuçiç, në orët e paraditës priti një delegacion biznesi nga SHBA:
“Për herë të parë pas 20 viteve, kemi pritur në Serbi delegacionin e biznesit nga Shtetet e Bashkuara. Kemi biseduar për forcimin e bashkëpunimit dhe partneriteteve të reja, sepse Serbia ka treguar se jo vetëm që është partner i besueshëm i korporatave të mëdha që me vite tëra punojnë me sukses në vendin tonë, por dhe ekonomia stabël e cila tregon një destinacion të shkëlqyeshëm për investim dhe biznes. Mirë se vini, miq të dashur!” u shpreh Presidenti i Serbisë, Aleksandar Vuçiç përmes rrjetit social Instagram, duke keqkuptuar këtë qokë të Ambasadorit të SHBA në Beograd, Chris Hill, dhe mesazhin e Departamentit të Shtetit pasi kërkoi nga Qeveria e Kosovës një shtyrje të plotë të vendimit për targat dhe jo shtyrje të pjesshme, për ta ndërsyer menjëherë ministrin e Mbrojtjes me kërcënimet e kosovarëve me luftë, pa e lexuar deri në fund mesazhin e DASH:
“Shtetet e Bashkuara mendojnë se Kosova ka të drejtë të zbatojë vendimin për targat, sipas Marrëveshjes së Brukselit, por SHBA është e zhgënjyer dhe e shqetësuar që Qeveria e Kosovës ka refuzuar kërkesën dhe këshillën e partnerëve të saj më të ngushtë sa i përket zbatimit të vendimit për targat.”
Sipas vendimit të Qeverisë së Kosovës, duke filluar nga data 1 nëntor, të gjithë pronarëve të makinave me targa serbe në Kosovë, do t’iu shqiptohet masë qortimi me kërkesë për t’u drejtuar në Qendrën e Regjistrimit të Automjeteve; Nga 21 nëntori deri më 21 janar, pronarët që kanë ende makina me targat serbe në Kosovë, do të gjobiten me 150 euro; Më vonë do të përdoren targat provuese, dhe pas 21 prillit, në Kosovë nuk do të mund të qarkullojnë makinat me këto targa.
