“Veriu në karantinë”, Sveçla: Me vendim të Ministrisë Shëndetësisë

Ushtruesi i Detyrës i Ministrit të Punëve të Brendshme, Xhelal Sveçla, tha se Mitrovica e Veriut dhe e Zveçanit janë vendosur në karantinë me vendim të Ministrisë së Shëndetësisë dhe me rekomandim të ekspertëve shëndetësorë.

Reagimi i Sveçlës erdhi pasi masat në Veri, sipas Presidentit Thaçi dhe Kryetarit të PDK, Kadri Veseli u tha se u morën nga autoritetet lokale dhe atyre të Serbisë.

“Komuna veriore e Mitrovicës dhe komuna e Zveçanit janë vendosur në karantinë për shkak të 16 rasteve të testuara pozitivisht me Covid-19. Sipas vlerësimeve dhe kërkesave të ekspertëve shëndetësorë, Ministri i Shëndetësisë, z. Arben Vitia, në bashkërendim me të gjitha Institucionet ka ndërmarrë vendimet dhe masat e duhura gjithnjë. Ai është në kontakt dhe komunikim të vazhdueshëm me dy kryetarët e këtyre dy komunave dhe autoritetet përgjegjëse. Unë, si ushtrues i detyrës së Ministrit të Punëve të Brendshme dhe Administratës Publike, dhe Drejtori i Policisë së Kosovës, z. Rashit Qalaj, jemi në koordinim të plotë me Ministrin Vitia. Po ashtu bashkëpunimi me KFOR-in është permanent dhe tejet i mirë. Të gjitha institucionet përgjegjëse po përcjellin situatën pandërprerë në mënyrë që reagimi i tyre të jetë konform gjendjes,” sqaroi Sveçla duke bërë thirrje të respektohen masat e kërkuara dhe të mos përhapet panik ndërsa përfundoi:

“Shteti ynë ndodhet para sfidës me të cilën shumë vende në mbarë globin po ballafaqohen. Mbrojtja e shëndetit dhe jetës së qytetarëve ndodhet mbi të gjitha. Që ne të jemi sa më të sukseshëm në këtë qëllim ne ftojmë të gjithë të kontribuojmë në tejkalimin e kësaj situate duke përsëritur apelet e Institutit Kombëtar të Shëndetit Publik e jo duke shpërndarë dezinformata apo informata të paverifikuara.”