Veseli: Do ta ndalim korrupsionin tek lejet e ndërtimit dhe ndërtimet pa leje

Kandidati i PDK-së për Kryeministër, Kadri Veseli, sot në takim me studentë dhe profesorë të arkitekturës ka diskutuar rreth planit të tij kundër korrupsionit dhe legalizimin e 350 mijë objekteve pa leje, të cilat që nga paslufta janë të bllokuara si kapital i qytetarëve që ka vlerën prej rreth 10 miliardë euro dhe nuk mund të përdoret si kapital formal.

Para studentëve, shpjegon ai planin e tij duke e shoqëruar edhe me një video përmes rrjetit social Facebooki, se përveç që pritet tu mundësojë qytetarëve marrjen e çertifikatave të pronësisë, po ashtu do të jetë plan për luftimin e korrupsionit për ndërtimet dhe lejet ndërtimore.

“Çështja e ndërtimeve pa leje dhe ajo e lëshimit të lejeve të reja të ndërtimit janë ndër më problematiket për sa i përket korrupsionit. Me studentë e profesorë të arkitekturës diskutova për Planin Kundër Korrupsionit i cili do eliminojë mundësitë për korrupsion duke legalizuar ndërtesat pa leje dhe krijuar sistemin e centralizuar dhe automatizuar të lëshimit të lejeve elektronike të ndërtimit,” tha Kadri Veseli para studentëve dhe profesorë të arkitekturës .