Vetëm kështu, do të ringrihemi

nga Dom Gjergj Meta*

E di që po na kushton dhe do të na kushtojë shumë kjo situatë. Ndoshta ditët po ju bëhen të lodhshme e një lloj shkurajimi apo nervozizmi fillon e shfaqet. Ah sa ju kuptoj! Më nodh edhe mua.

Ka shumë rëndësi tani ama të shtojmë përpjekjet tona, ta nxjerrim forcën dhe durimin nga thellësitë e jetëve tona e të vazhdojmë të drejtojmë zemrat kah Zoti, të kemi durim e shumë dashuri me njëri-tjetrin dhe të ruajmë izolimin e kërkuar. Ta marrim si sfidën e jetës tonë.

Do të “humbasim” diçka tani, por do të fitojmë më vonë. E mbi të gjitha do të ndjehemi krenarë që sakrifikuam sadopak nga vetja për të mirën tonë e të tjerëve. Kush është i fortë t’i bëhet ndihmë atyre që janë më të dobët, sidomos të sëmurëve, atyre me aftësi ndryshe etj.

Nuk ka një fjalë më të bukur këtë herë se fjala solidaritet. Askush të mos ndjehet vetëm, por të gjithë të ruajmë njëri-tjetrin.

Vetëm kështu, edhe pse të plagosur, do të ringrihemi përsëri.

Ditë të bukur!

*Ipeshkëv i Dioqezës së Rrëshenit