VIDEO/ Franca siguron finalen e madhe, Belgjika e pafat…
Franca siguroi finalen e madhe, ndërsa Belgjikës i mbetet të luftojë për medaljen e bronztë në Kampionatin Botëror – “Rusia 2018”.
Franca shënoi fitore me rezultaint minimal 1:0 kundër Belgjikës, në ndeshjen gjysmëfinale që u zhvillua në stadiumin St. Petersburg.
Samuel Umtiti realizoi në minutën e 51-të për “Gjelat”, pas një goditjeje këndore. Francezët bënë një lojë mjaft të mirë, kurse Belgjika me gjithë angazhimin e madh nuk ia doli në këtë sfidë.
Në minutën e 22-të, Toby Alderweireld nga rreth 14 metra goditi me të majtën e tij por portieri Lloris reagoi shkëlqyeshëm dhe shpëtoi portën e tij. Oliver Giroud në minutën e 31-të sikur të ishte më i shkathët do të mund të shënonte në portën e Belgjikës.
Gjashtë minuta nga fundi i pjesës së parë (39′) futbollisti Benjamin Pavard më vështirë e kishte të nxirrte topin jashtë se sa të shënonte, por ai nga afërsia u tregua i ngathët, duke befasuar të gjithë të pranishmit.
Në pjesën e dytë pikërisht në minutën e 47-të, Lukaku kërcënon portën e Francës, por gjuajtja e tij shkoi mbi portë. Në minutën e 51-të, mbrojtësi Samuel Umtiti kërceu fuqishëm dhe nga afërsia me kokë mposhti portierin Courtois, 1:0.
Pas pesë minutave (56′) Mbappe dhe Giroud nuk u treguan të saktë, lëshuan një mundësi të mirë që ta dyfishojnë epërsinë.
Belgjika luftoi me mish e më shpirt edhe në minutën e 65-të pati rast, por Fellaini i pafat, goditja e tij me kokë nga rreth 12 metra shkoi përskaj pingules së portierit Lloris.
Në minutën e 81-të, Witsel realizoi një goditje të fortë por Lloris tregoi cilësitë e tij. Franca triumfoi me rezultatin 1:0 dhe me plot meritë është në finalen e madhe, e cila pret fituesin e takimit mes Kroacisë dhe Anglisë, që luhet të mërkurën mbrëma (20.00).
Franca-Belgjika 1:0
Stadiumi St. Petersburg.
Shikues: 64.000.
Gjyqtar: A. Cunha (Uruguai).
Shënues: Umtiti (51′).
Kartonat e verdhë: Kante, Mbappe – Hazard, Alderweireld, Vertonghen.
Franca: Lloris, Pavard, Varane, Umtiti, Lucas, Pogba, Kante, Mbappe, Griezmann, Matuidi (Tolisso 86′) dhe Giroud (N’ Zonzi 85′).
Belgjika: Courtois, Alderweireld, Kompany, Vertonghen, Chadli (Batshuayi 90+1′), Dembele (Mertens 60′), Witsel, Fellaini (Carrasco 80′), Bruyne, Lukaku dhe Hazard.
