Video/ Nënkryetari i Listës Srpska në krye të grupit terrorist, Sveçla: Ky është Milan Radojçiç!
Ministri i Brendshëm i Kosovës, Xhelal Sveçla sot ka sjellë dëshmi të reja për implikimin e Listës Srpska që mbështetet nga Presidenti i Serbisë, Aleksandar Vuçiç, në sulmin terrorist ndaj Policisë së Kosovës në Banjskë, ku në pamje filmike shihet qartë Nënkryetari i kësaj partie kriminale dhe drejtuesi i këtij grupi terrorist, Milan Radojçiç!
“Ky në pamjet më poshtë është Milan Radojçiq, nënkryetar i Listës Serbe, po ashtu pjesë edhe e Listës së Zezë të ShBA-së dhe Mbretërisë së Bashkuar.
Kryekrimineli Radojçiq ka qenë udhëheqës i këtij grupi terrorist dhe i sulmit ku mbeti i vrarë polici Afrim Bunjaku. Kjo është edhe një dëshmi tjetër mbi veprimtarinë e tij terroriste ndaj Republikës së Kosovës. Nënkryetari i Listës Serbe është prijës i sulmit terrorist dhe grupit të terroristëve,” shprehet ministri Xhelal Sveçla duke shtuar se harta e sulmit terrorist po qartësohet çdo ditë:
“Aleksandar Vuçiq përmes Listës Serbe, dhe këta përmes nënkryetarit të tyre Radojçiq, kanë ndërmarrë veprimin terrorist kundër rendit juridik dhe kushtetues të Republikës së Kosovës duke tentuar të destabilizojnë Republikën tonë. Pra, LS e sheh pjesëmarrjen e saj në Kosovë vetëm në mënyrë terroriste. Ata dështuan. Ndërkohë, ditët e zisë të shpallura sot nga Serbia dhe Lista Serbe janë tashmë vulosja e autorësisë së këtij organizimi.”
Ndërkohë Policia e Kosovës ka arrestuar dhe dy bashkëpunëtor të këtij grupi terrorist në Basnjskë ndërsa është gjetur edhe një mjet i blinduar në afërsi të Manastirit Banjska!
