Video/ Osmani: Ushtria e Kosovës është ndërtuar në themelet e sakrificës sublime

Ushtria e Kosovës është ndërtuar në themelet e sakrificës sublime, tha U.D. Presidentja Vjosa Osmani duke iu drejtuar ushtarëve të Forcës së Sigurisë së Kosovës, FSK, me rastin e Ditës së Forcës, duke shtuar se ajo është e gatshme t’i dalë në çdo kohë në mbrojtje atdheut.

“Ushtria e Kosovës është ndërtuar në themelet e sakrificës sublime. Është e zonja t’i dal zot atdheut në çdo kohë. Sot ushtria e Kosovës është simbol i shërbimit. Qëllimi kryesor i jonë gjithmonë ka qenë mbrojtja e atdheut tonë,” tha Presidentja Vjosa Osmani përmes një video-mesazhi, për shkak se vazhdon izolimin pas infektimit me koronavirus.

Me këtë rast ajo e bëri të qartë se anëtarësimi i Kosovës në NATO mbetet synim strategjik.

“Të stërvitur me standardet më të larta të NATO-s. Oficerët dhe nënoficerët po shkollohen jashtë vendit. Në këtë ditë të veçantë nuk të mund të mos shprehim falënderim për aleatët tanë. Anëtarësimi i Kosovës në NATO mbetet synim strategjik. Kosova ka mjete të mjaftueshme që të siguroj transformimin e FSK-së. Ju garantoj se mbështetjen time do ta keni përherë. Urime dita e forcës”.

Fjalën e rastit me këtë rast mbajtën edhe kryeministri Avdullah Hoti, ministri i Mbrojtjes Anton Quni dhe komandanti i FSK-së, Rrahman Rama.