Video/ Sulmi terrorist, Kurti: Me skenar për gjakderdhje në Kosovë!
Në mbledhjen e qeverisë e cila filloi më një minutë heshtje për heroin Afrim Bunjakun, i rënë në veri të Kosovës gjatë përplasjes me terroristët serbë, Kryeministri i Kosovës, Albin Kurti, tha se u dëshmua se ky grup i armatosur kishte skenar për gjakderdhje në Kosovë me armatimin me vlerë mbi pesë milionë euro dhe sasi të mjaftueshme për qindra luftëtarë.
“Aty janë përshirë individë të sanksionuar nga SHBA-të dhe Mbretëria e Bashkuar për aktivitete kriminale. Ata janë në kërkim nga institucionet e Kosovës të drejtësisë për vepra penale në Kosovë. Ata shfaqen në krah e përkrah në një tryezë në Rashkë e Beograd me presidentin e Serbisë Vuçiç duke paralajmëruar rolin e drejtpërdrejt të shtetit serb në këtë mes,” tha Albin Kurti duke vlerësuar profesionalizmin e lartë të Policisë së Kosovës në aksionin kundër terroristëve në veri të vendit.
Pas dëshmisë mbi pjesëmarrjen e Radoiçiçit në sulmin e së dielës ndaj Policisë së Kosovës në Banjskë të Zveçanit, Kryeministri Kurti tha se është jetik pluralizmi politik te serbët.
“Pas dokumentimit të pjesëmarrjes së nënkryetarit të Listës Serbe, Milan Radoiçiç, është vërtetuar një gjë që meriton vëmendjen e të gjithëve, rëndësia jetike e ringjalljes së pluralizmit politik të serbëve në Kosovë. Nuk ka demokraci e liri pa pluralizëm, serbët e Kosovës duhet të çlirohen nga tutelat e Serbisë.”
Ndryshe, Qeveria e Kosovës ka ndarë 50 mijë euro për familjen e rreshterit Afrim Bunjaku, i cili u vra të dielën e 24 shtatorit nga terroristë serbë në Banjskë të Zveçanit. Me këtë rast, Kryeministri Albin Kurti tha se është obligim i Kosovës përball vetëmohimit të Afrimit, dhe veprës heroike që ai la.
