Video/ Tragjedi në autostradën Beograd-Nish: 7 të vdekur, 40 të plagosur. Ka dhe shqiptar…

Në autostradën Beograd-Nish, në mes të Çuprisë dhe Jagodinës kanë ndodhur dy aksidente ku janë përfshirë mbi 40 makina dhe për pasojë kanë mbetur 7 të vrarë dhe 40 të plagosur ndër të cilët edhe një shqiptar.

Trafiku është bllokuar në  të dy anët e autostradës ndërkohë aksioni për nxjerrjen e trupave nga makinat e shkatërruara plotësisht vazhdon, dhe interesante është se aksidentet kanë ndodhur në të dy anët e autostradës, Beograd-Nish dhe Nish-Beograd, pothuajse në të njejtin vend.

Sipas vlerësimit të policisë, të plagosur janë rreth 40 persona ndërsa janë shkatërruar mbi 40 makina.

Në Spitalin e Jagodinës janë vendosur 7 të plagosur, 2 shtetas të Serbisë, 1 i Shqipërisë, 1 i Gjermanisë, 1 i Greqisë, 1 i Turqisë dhe 1 i Polonisë. Sipas Drejtorit të Spitalit, Millosh Llukiç, një person është zhvendosur në Neurokirurgji në Çupri, e të tjerët janë mbajtur në Jagodinë, dhe bëhet fjala për lëndime kirurgjike dhe ortopedike, raporton Agjencia e serbe e lajmeve Tanjug.

“Lëndimet janë serioze, por të gjithë janë jashtë rrezikut për jetën,” tha Llukiç.

Në Qendrën e Urgjencës në Çupri, për kujdesin e të lënduarve janë angazhuar mjekë të shumtë duke përfshirë edhe drejtorin Sllobodan Gajiç,” raporton Tanjug.

Shkaktare mjegulla

Dy aksidentet kanë ndodhur në një distancë prej 400 metrave ndonëse në kahe të kundërta të autostradës.

Në aksidentin e parë i cili ndodhi në drejtimin Beograd-Nish, 4 persona kanë humbur jetën. Në këtë aksident u përfshinë mbi 10 makina ndërkohë morën flakë edhe 2 kamionë.

Aksidenti i dytë ka ndodhur në po të njëjtin vend nga ana e tjetër e autostradës, nga Nishi në drejtim të Beogradit, ku mbetën të vdekur 3 persona, dhe mbi 10 të lënduar. Në këtë aksident u përfshinë 9 kamionë dhe disa makina.

Të dy aksidentet kanë ndodhur në të njëjtën kohë, rreth orës 07:15 dhe shkaktar i aksidentit është mjegulla e dendur, e cila kishte ulur pamjen nën 10 metra.

Ekipet e emergjencës vazhdojnë operacionin e shpëtimit nga makinat të cilat janë shkatërruar plotësisht ndërkohë zjarrfikësit me fresibël janë duke ndarë makinat në pjesë për të verifikuar nëse ka mbetur në gërmadhat e këtyre makinave edhe ndonjë person tjetër.