Viktor Orban, fashisti që merr lekë nga Shqipëria dhe mbron Serbinë!
Kur mbështeti Presidentin Trump nga liderët evropianë u cilësua si autokrat, sot që mbështet kriminelin Putin nuk anatemohet! U konsiderua armiku kryesor i George Soros dhe mbështet shtetet që përqafuan projektin e tij, Ballkani i Hapur! Dhe, me njerëzit e tij, blenë zemrën e funksionimit të Shqipërisë, Albtelecomin dhe mbron Serbinë! Ky është Viktor Orban, njeriu i vetëm në BE i cili sulmin terrorist serb ndaj Kosovës e cilësoi përgjigje ndaj provokimit shqiptar!
nga Agim Popoci
Siç thonin romakët e lashtë, paraja nuk mban erë, po i zoti i atyre parave mban erë! Kështu e tha mesqershorin e këtij viti në Tiranë, Kryeministri i Hungarisë, Viktor Orban, por shqiptarët që i kishin besuar zemrën e komunikimit të Shqipërisë me botën përmes telefonit dhe internetit, Albtelecom, nuk e kuptuan mesazhin e njeriut që promovoi përndjekjen e George Soros nga shteti që ai drejtonte ndërkohë që mbështeste shtetet anëtare të projektit antikosovar të këtij “filantropi”, Ballkani i Hapur, ndërkohë që biznesi i afërt me këtë njeri kishte blerë edhe kompaninë celulare AMC ndërsa kishte hapë një bankë me para shumë të dyshimta, OTP Bank, si dhe kishte nisur linjat ajrore nga Tirana kompania më pa lidhje në botë, Wizz Air!
Por, shumë shpejtë shqiptarët me ndihmën e vetë Viktor Orbanit do ta kuptojnë pse ai quhej autokrat kur mbështeste Presidentin amerikan Donald Trump, dhe pse kur në pushtet erdhi Joe Biden i George Soros, nuk reagon njeri kur ai mbështet Presidentin e Rusisë, Vladimir Putin, që zyrtarisht është armiqësuar me gjithë botën, përveç se me Orbanin dhe Vuçiçin!
Pse Presidenti i Serbisë, Aleksandar Vuçiç, e konisderon pavarësinë e Kosovës si cenim i 11 mijë kilometrave/katrorë të shtetit serb, por jo dhe 21 mijë kolmetrave/katrorë të Vojvodinës për të cilat Viktor Orban e shpreh se janë pjesë e Hungarisë së Madhe!
Pse Kryeministri Viktor Orban nuk reagoi kur terroristët serb në veri gjatë përplasjes me forcat e KFOR-it lënduan dhjetëra pjesëtarë hungarezë të misionit të NATO-s, njërit prej të cilëve për fat të keq i amputuan edhe këmbën!
Dhe, në fund, pse është Viktor Orban i vetmi lider i Bashkimit Evropian që mendon se sulmi serb i 24 shtatorit nuk ishte sulm terrorist ndaj Kosovës por një përgjigje ndaj provokimit të Kosovës!
Fundjava me Orbanin!
Deklarata e Kryeministrit të Hungarisë në prag të Samitit të Tretë të Komunitetit Politikë Evropian që u zhvillua në Granada të Spanjës la të shqetësuar të mendojnë shqiptarët e Kosovës përgjatë gjithë kësaj fundjave ndryshe ka pjesa tjetër e botës që vazhdon e merret me luftën në Ukrainë, konfliktin në mes të Armenisë dhe Azerbajxhanit, dhe luftës së re që shpërtheu në Rripin e Gazës në mes të Izraelit dhe Palestinës.
Të thotë një lider, njerëzit e të cilit kanë blerë çelësin më strategjik shqiptar, i cili kontrollon çdo komunikim me telefon dhe internet, zyrtar ose jozyrtar, që bënë Shqipëria, Albtelecom, se sulmi terrorist serb i 24 shtatorit ndaj Kosovës ishte një përgjigje ndaj provokimeve kosovare që rezultojnë në stabilitet, i zoti i parave hungareze në Shqipëri jo vetëm që mban erë por kutërbon.
“Serbët janë përballur me provokime në dy vitet e fundit rregullisht. Prandaj na duhet ta kuptojmë që kosovarët duhet të sillen në mënyrë tjetër, mos provokoni serbët. Provokimet çojnë në përgjigje që rezultojnë në stabilitet,” tha Viktor Orban nga Granada duke ju thënë shqiptarëve se pa Serbinë nuk ka stabilitet në Ballkan!
Nuk dihet se për cilën Serbi e kishte fjalën Viktor Orban, me ose pa Vojvodinën, atë të Ballkanit të Hapur, dhe, pse shqiptarët e Kosovës duhet ta harrojnë atë Serbinë kriminale të viteve ’90, kur me Serbinë kishte vetëm keqtrajtim, përdhunim dhe masakrim të joserbëve dhe asgjë nga stabiliteti i Ballkanit edhe pse ministër i Slobodan Milosheviçit ishte ky që sot drejton shtetin serb dhe Orban e ka mik, Aleksandar Vuçiç!
Dhe, si mund të krijoj stabilitet kjo Serbi nga e cila edhe vetë Viktor Orban ka pretendime territoriale!
Pas një ndeshje të kombëtares hungareze në fundnëntorin e vitit të kaluar, kur Orban si Kryeministër dhe kryetari i partisë Fidesz, shkoi të përshëndetet me lojtarin Ballazh Xhuxhak mbante shallin ku ishte harta e “Hungarisë së Madhe”, me pjesët që sot i takojnë Sllovenisë, Rumanisë, Ukrainës, Kroacisë, Sllovakisë, Austrisë dhe Serbisë, ose 70 për qind e territorit që sot nuk është hungarez ose që nga fundi i luftës së parë botërore!
Ukraina reagoi menjëherë, Rumania e thirri ambasadorin hungarez në Bukuresht e mediat nën kontrollin e Orbanit e relativizuan duke e konsideruar si çështje futbolli, Vuçiç heshti por Kryeministri i Hungarisë e hoqi nga profili i tij në instagram edhe pse impianti i tij mediatik u mundua ta degdis në pjesën e së shkuarës “diçka që ishte në shallin e tifozëve”.
Por, nuk ishte çështje shalli! Pak muaj para se të dilte shalli me hartën e “Hungarisë së Madhe”, Viktor Orban duke folur për televizionin publik tha se “Hungaria do të ishte në situatë më të mirë energjetike sikur të kishte dalje në det, e cila i është marrë”, duke aluduar në portin e Rijekës në Kroaci e cila i takonte këtij shteti para luftës së parë botërore.
Në majin e vitit 2020, Kryeminisri i Hungarisë duke i dëshiruar fat maturantëve që atë ditë kishin test nga historia, në fotografinë e globit ishte “Hungaria e Madhe”.
Po këtë vit, në qershor, në 100 vjetorin e firmosjes së Marrëveshjes së Trianonit, Viktor Orban zbuloi përmendoren në kufi me Hungarinë dhe Sllovakinë ku ndodhet memoriali me hartën e “Hungarisë së Madhe”.
Harta u shfaq edhe në vitin 2019 kur Viktor Orban në rrjetet sociale publikoi foton e partisë së tij, ku në sfond ishte ky simbol.
Që nuk është çështje harte dhe shalli, Viktor Orban e ka demonstruar edhe më tej dhe Presidenti i Serbisë ka zgjedhur të heshtë pavarësisht se traumatizohet për çdo lëvizje në Kosovë, ndërsa në ditën që Orban është shfaqur me shallin e “Hungarisë së Madhe”, Vuçiç ka emëruar për shef të shërbimit sekret serb, BIA, Aleksandar Vulinin.
Po, po, atë Vulinin që do ta bëjë “Botën Serbe”!
Se si do ta bëjë Vulini këtë “Botë Serbe” nuk dihet, por që do ta bëjë pa 21.614 km2 të Vojvodinës, Viktor Orban i bëri të qartë që nuk janë hungareze dhe Vuçiç nuk i konsideroi pretendim territorial; Ose, ky këlqysh i Vuçiçit mjaftohet që shefi i thotë se 10.887 km2 e Kosovës duhet të ruhen sepse janë pretendim territorial, sepse vetëm kështu e pranon vetë Orban!
Vuçiç dhe Vulin mund të heshtin edhe për shumë gjëra, por, më 30 gusht 2022 në Parlamentin e Hungarisë u vendos busti i Miklosh Horthyit, kriminelit të luftës nga lufta e dytë botërore, përgjegjës për masakrat në Vojvodinë ashtu si dhe ngritja e përmendores së “viktimave të pafajshme” në Novi Sad ku historia serbe akuzon ushtrinë fashiste hungareze për masakra makabre!
“Tmerri” i Sorosit mbështetë Ballkanin e Hapur
Për të kuptuar më mirë “rolin” e Viktor Orbanit në Ballkan ëshë rasti i Fondacionit Soros! U tha se George Soros u përndjekë nga Hungaria, por, zyrtarisht nuk e sqaroi njeri që edhe pas kësaj fotoje të takimit të Ballkanit të Hapur në Beograd, ku shihet i biri Alex Soros se si i ka vu në rresht krerët e shtetit të Serbisë, Shqipërisë dhe Maqedonisë së Veriut, Orban është i dashuruar me projektin e Sorosit!
“Ne e kemi përgëzuar shumë dhe Ballkanin e Hapur. Hungaria gjatë gjithë kohës do të mbështesë këto iniciativa,” tha Viktor Orban në Tiranë, i cili vetëm gjashtë vjet më parë alarmoi botën se qeveria e tij ishte nën presionin e miliarderit George Soros, presion shumë më të madh se sa në periudhën e okupimit sovjetik gjatë Luftës së Ftohtë!
Dhe jo vetëm kaq! Sipas shërbimit sekret hungarez, alarmoi Orban botën në fundin e vitit 2017, George Soros do të rrëzoj të gjitha qeveritë që kundështojnë emigrimin e muslimanëve në Evropë, dhe publikoi listën e 226 eurodeputetëve aleatë të Sorosit!
Pas këtyre shfaqjeve qesharake me George Sorosin, pas blerjes së asetit më të madh strategjik shqiptar, Albtelecom, sot rrezik serioz i Ballkanit Perëndimor është Aleksandar Vuçiç pasi ka mbështetjen absoulte nga fashisti që merr lekë nga Shqipëria dhe mbron Serbinë ndërsa sulmin terrorist serb të 24 shtatorit në Banjskë e konsideron një përgjigje ndaj provokimeve kosovare që çojnë në stabilitet.
