Vjosa Osmani: Me Serbinë dialogojmë vetëm për njohje!

Ushtruesja e detyrës së Presidentit të Kosovës, Vjosa Osmani, tha se me Serbinë do të ketë dialog vetëm për njohje të ndërsjellë ndërsa shteti serb duhet ta pranojë peshën e fajit historik. Para përfaqësuesve të shoqatave të familjarëve të personave të pagjetur, Vjosa Osmani shprehu angazhimin në zbardhjen e fatit të personave të zhdukur duke shtuar se paqja është e mundur vetëm atëherë kur thuhet dhe pranohet e vërteta.

“Ky është pengu i cili e mban të varur dialogun, pra mos-pranimi i fajit nga Serbia, mbajtja peng e mbi 1600 qytetarëve tanë si të zhdukur me dhunë, e mbi të gjitha mungesa e drejtësisë për viktimat e gjenocidit serb. Por ne nuk mund të heshtim e nuk do të rreshtim së punuari që paqja të mbretërojë në të gjitha hapësirat që jetojmë sepse ky është interes i qytetarëve tanë e interes i yni strategjik. E paqja është e mundur vetëm atëherë kur thuhet dhe pranohet e vërteta, e vërteta e vetme e cila nuk mund të ndryshojë kurrë e as të përmbyset është ajo që ka ndodhur para syve të të gjithë botës, e vërteta e vetme e që nuk mund të përmbyset është që Serbia kreu gjenocid kurse ne ishim viktima të këtij gjenocidi,” tha U.D.Presidentja e Kosovës duke garantuar familjarët se janë të vendosur të kërkojnë me ngulm nga Serbia që të pranojë të vërtetën mbi Kosovën ndonëse deri më sot asnjë nga liderët e serb nuk ishte i gatshëm të bëjë atë që e bëri ish-kancelari gjerman para 50 vitesh, të kërkojë falje e të përkulet para viktimave që i shkaktoi ai regjim.

“Jemi të vendosur që të dialogojmë vetëm për njohjen e ndërsjellë, vetëm duke respektuar integritetin territorial dhe sovranitetin e shtetit, duke njohur dhe pranuar paprekshmërinë e territorit, rregullimin kushtetues dhe nivelin e organizimit të brendshëm por mbi të gjitha duke kërkuar me ngulm që Serbia ta pranojë peshën e fajit historik, a është Serbia e gatshme, jo, madje një jo e madhe, asnjë nga liderët e serb nuk ishte i gatshëm të bëjë atë që e bëri ish-kancelari gjerman para 50 vitesh, të kërkojë falje e të përkulet para viktimave që i shkaktoi ai regjim, ta bëjë atë që e bën një qenie njerëzore kur dhimbja nuk mund të përshkruhet me fjalë, pra të përkulet para viktimave,” tha Ushtruesja e detyrës së Presidentit të Kosovës, Vjosa Osmani duke saktësuar se fshehja e informatave nga Serbia, lidhur me vendndodhjen e trupave të shqiptarëve të zhdukur, është vazhdim i krimit sistematik që Serbia po vazhdon të kryejë.