Vuçiç: Dialogu me Prishtinën mund të vazhdojë në dhjetor

Presidenti i Serbisë, Aleksandar Vuçiç tha se në rastin më të mirë negociatat me Prishtinën do të vazhdojnë në muajin dhjetor.

“Vështirë se mund të ketë vazhdim të dialogut para mbajtjes së zgjedhjeve në Kosovë, të cilat besoj se do të zhvillohen më 6 tetor. Kjo do të thotë se në rastin më të mirë, në fillim të dhjetorit mund të vazhdojë dialogu, por para kësaj, e rëndësishme është të bisedohet për heqjen e taksës,” tha Aleksandar Vuçiç për televizionin serb, Prva, pas takimit me Sekretarin amerikan të Shtetit, Mike Pompeo.

Presidenti serb tha se “status quoja” është e pamundur, raporton RFE, dhe se është e rëndësishme të ruhet paqja, pasi siç tha, “një pushkë nëse shkrepet atëherë askush nuk mund të ndalë bubullimën e topave, dhe kjo askujt nuk i duhet”.