Vuçiç i raporton Putinit: Jemi larg zgjidhjes për Kosovën!

Presidenti i Serbisë, Aleksandar Vuçiç duke raportuar para presidenti të Rusisë, Vladimir Putin në Kremlin tha se pavarësisht përpjekjeve serbe për të arritur kompromis dhe të mbështesin paqen dhe stabilitetin, jemi shumë larg zgjidhjes për Kosovën.

Me një rusishte të rrjedhshme, Vuçiç duke falemnderuar Putinin për marrëdhënie të mira të dy shteteve theksoi në veçanti qëndrimin rus në ruajtjen e interesave të Serbisë.

Duke folur për Ballkanin, presidenti i Serbisë tha se situata është shumë komplekse dhe Serbia si shtet po përballet me provokime të shumta:

“Pavarësisht përpjekjeve tona që të arrijmë një kompromis dhe të mbështesim paqen dhe stabilitetin, jemi shumë larg një zgjidhje për Kosovën. Serbia si shtet i lirë dhe i pavarur do ta ruaj neutralitetin e saj ushtarak. Sot Serbia është i vetmi shtet në Ballkanin Perëndimor me një përcaktim të tillë,” tha Vuçiç ndërsa i dhuroi librin “Serbia ime e mrekullueshme” e autorëve rus.

Presidenti i Rusisë nga ana e tij shprehu kënaqësinë që sërish mund të bisedoj me homologun serb në Moskë.

“Më kujtohet vizita e fundit më 8 dhe 9 maj. Para pak kohësh kemi shënuar 180 vjetorin e marrëdhënieve tona diplomtaike. Me kënaqësi vërej rritjen e shkëmbimeve tregtare. Kjo rritje vitin e kaluar ishte 23 për qind, në gjashtëmujorin eparë të këtij viti 13 për qind,” tha Putin duke shtuar se po rriten edhe investimet ruse në ekonominë serbe:

“Tashmë investimet kanë arritur 4 miliardë dollarë. Jam i sigurtë se do të kemi për çfarë të bisedojmë për situatën në rajon,” tha Putin..