Wagner: Javën e ardhshme do t’i largojmë forcat nga Bahmuti

Yevgeny Prigozhin, themelues i grupit paraushtarak rus Wagner në Rusi, tha sot përmes një njoftimi të papritur se forcat e tij do të largohen nga qyteti ukrainas i Bahmutit, të cilin ata po përpiqeshin ta pushtonin që nga vera e kaluar.

Prigozhin, raporton RFE, tha se ata do të largohen më 10 maj për shkak të humbjeve të mëdha dhe furnizimeve të pamjaftueshme me municione.

“Unë deklaroj në emër të luftëtarëve Wagner, në emër të komandës Wagner, se më 10 maj 2023, ne jemi të detyruar t’i transferojmë pozicionet nga vendbanimi Bahmut në njësitë e Ministrisë së Mbrojtjes dhe t’i tërheqim trupat e mbetur të Wagnerit në kampet e logjistikës”, tha Prigozhin në një deklaratë.

“Unë po i tërheq njësitë Wagner nga Bahmuti, sepse në mungesë të municioneve, ato janë të destinuara të humbasin në mënyrë të pakuptimtë”, shtoi ai.

Wagner ka qenë në krye të përpjekjes së Rusisë për të kapur Bahmutin që nga vera e kaluar, në betejën më të gjatë dhe më të përgjakshme të luftës në Ukrainë, që nisi në shkurt të vitit 2022.

Nuk ishte e qartë nëse deklarata e Prigozhinit mund të merret seriozisht, pasi ai ka postuar shpesh komente impulsive në të kaluarën, raporton RFE. Vetëm javën e kaluar ai tërhoqi një deklaratë që tha se e kishte bërë si “shaka”.