Zbulimet në Shpirag, Rama: Nafta e cilësisë së lartë, investimi total do të shkojë në 7 mld euro!

Nafta e nxjerrë nga kërkimet në Shpirag është e një cilësie të lartë, e cila mund të krahasohet edhe me naftën premium të Arabisë Saudite, deklaroi kryeministri Edi Rama në një dalje për mediat.

Pas një pune më shumë se dhjetëvjeçare shpimi në Shpirag ka arritur në 6002 metra në thellësi të tokës duke prekur një rezervë të madhe nafte.

Rama bëri me dije se qeveria planifikon që taksat që do mblidhen çdo vit nga nxjerrja e naftës në Shpirag dhe që parashikohet të jenë qindra milionë dollarë në vit ti administrojë nga Fondi Sovran.

“Rezerva është aty, në 6002 km në thellësi të tokës. Është prekur rezerva pas një eksplorimi shumë të vështirë dhe një investimi masiv të bërë për shkak të thyerjes së përsëritur të sondave, si rezultat i formacionit gjeologjik. Ende nuk është cekur uji, që është nën rezervën, çka prezumon që madhësia e rezervës mund të jetë edhe më e madhe. Nuk flasim dot për shifra konkrete. Informacionet në këtë fazë janë jo vetën konfidenciale, por pa marrë rezultatin e testit final që përcakton nëse nxjerrja e kësaj pasurie është e arsyeshme nga pikëpamja financiare. Nëse do ishte më i kushtueshëm se sa përfitimi, kuptohet që rezerva mbetet aty për një kohë tjetër kur teknologjia mund të avancojë në përmasa që sot nuk janë. Edhe pse Shell ka përdorur teknologjinë më të fundit. Testi do nisë në tetor dhe rezultatet bazohen në ndjekjen e qëndrueshmërisë së fluksit që del mbi sipërfaqe. Nafta e zbuluar është e cilësisë më të lartë, hera e parë që kjo ndodh në vendon tonë. Sipas analizave të bëra në Holandë është naftë e së njëjtës cilësi të naftës premuim të Arabisë Saudite”.

“Fondi Sovran do të ketë profil që do të integrojë domosdoshmërinë për mbështetjen e pensionistëve dhe balancimin e barrës së tmerrshme të trashëguar nga e kaluara me parimin etik që kjo pasuri është qoftë e atyre që jetuan e punuan në këtë vend e nuk patën pjesën e tyre dhe të atyre që lindin dhe kanë të drejtën të kenë pjesën e tyre. Fondi sovran është fond investimesh që një pjesë e të ardhurave i vendos për të shumëfishuar në tregun ndërkombëtar. Po punojmë me qendrën për zhvillim ndërkombëtar në universitetin e Harvardit”.

Investimi total do të shkojë në 7 miliardë euro.

“Investimi, nis me 3 miliardë euro dhe projeksioni është se deri në përfundim të të gjithë infrastrukturës së nevojshme, pasi do të nisë puna për një sërë shpimesh për të krijuar te gjithë kompleksin e nevojshëm për nxjerrjen e kësaj pasurie është 7 miliardë investim në vendin tonë.

Investim që parashikon ndërtimin e gjithë infrastrukturës dhe logjistikës për dhe depozitimin e rezervës, ndarjen enë gaz, naftë e sulfur dhe e treta ka një rëndësi të veçantë se krijon bazë qoftë për prodhimin e inputeve bujqësore apo për produktet kozmetike , bazë të cilën Shqipëria mund ta shfrytëzojë për të ndërtuar një komponent industrial që sot na mungon”.

Ministrja e Infrastrukturës dhe Energjisë Belinda Balluku deklaroi se në fillim të muajt tetor do të nisë faza e testimit.

“Nafta e nxjerrë është e cilësisë së lartë, e krahasuar nga laboratorët e SHELL si një nga naftat e cilësisë më të lartë, por është për tu përcaktuar në të ardhmen ndarja e këtij produkti. Në këto momente po punohet me SHELL për të bërë ndarjen e nënproduktit gazi, nafta e acidi sulfurik. Ndërkohë nga fundi i tetorit deri në fund të dhjetorit, fillim janari do të ketë një rezultat publik nga vetë kompania SHELL që do të deklarojë dhe do të vendosë të marrë dhe vendimin për krijimin e infrastrukturës nga industria e ndarjes tek burimi më pas tek transporti që duhet bërë”./Monitor/