Zbulohet vendimi i fshehtë i 4 anëtarëve të PS në KQZ, si u shkel ligji për Gjinushin

Fleta e votimit për këshilltarët bashkiakë, që kishte të renditur në numrin 28 të saj kryetarin e Partisë Social Demokrate, Skënder Gjinushin, është zhdukur.

Në shkelje të hapur të ligjit dhe në fshehtësi të plotë, katër anëtarët e majtë në Komisionin Qendror të Zgjedhjeve kanë vendosur ta çregjistrojnë Gjinushin si kryetar të PSD-së dhe t’i hapin rrugë dekretimit të tij si kryetar i Akademisë së Shkencave. Gazeta “Panorama” publikoi në 30 maj fletën e votimit të miratuar nga KQZja për zgjedhjet e 30 qershorit, ku në listën shumemërore të partive ekzistonte edhe emri i kryetarit të zgjedhur të Akademisë së Shkencave, Skënder Gjinushi, në pozitat e kreut të subjektit politik PSD.

Pavarësisht deklarimeve publike të z.Gjinushi, se përpara se të merrte drejtimin e Akademisë së Shkencave kishte hequr dorë nga angazhimet politike, në zyrat e KQZ-së nuk ka pasur asnjë shkresë që vërtetonte këtë gjë. I gjendur në këto pozita, ku sipas ligjit kryetari i një partie politike nuk mund të jetë as anëtar i Akademisë së Shkencave dhe jo më kryetar i saj, Skënder Gjinushi i është drejtuar Gjykatës së Tiranës.

Vendimi

Në datën 06.06.2019, Gjykata e Shkallës së Parë në Tiranë ka vendosur të pranojë kërkesën e Këshillit Drejtues Kombëtar të PSD-së për çregjistrimin e Skënder Gjinushit si kryetar të partisë, pas dorëheqjes së tij të parevokueshme. Një kopje e këtij vendimi i është dhënë edhe drejtuesit të zgjedhur të Akademisë së Shkencave, Skënder Gjinushi, por ajo që e bën më interesant dokumentin e lëshuar është fakti se aty qartësohet që vendimi i Gjykatës nuk ka marrë formë të prerë. “Shënim:Ky vendim nuk ka marrë formë të prerë. E lëshojmë këtë vërtetim me kërkesën e palës kërkuese”, thuhet në vendimin e Gjykatës së Tiranës. Në një njoftim të Komisionit Qendror të Zgjedhjeve të datës 06.06.2019 njoftohej për 29 pika në rendin e ditës, por në asnjë prej tyre nuk flitej për çregjistrimin e kreut të PSD-së.

Shkeljet e KQZ

Pasi kishte një dokument gjykate, por i cili ende nuk kishte marrë formë të prerë, kreu i Akademisë së Shkencave, Skënder Gjinushi, i është drejtuar në të njëjtën ditë me kërkesë Komisionit Qendror të Zgjedhjeve për të ndryshuar emrin e kryetarit të PSD-së në fletën e votimit. Në urgjencë të plotë për të dalë me një vendimmarrje për këtë vendim, Komisioni Qendror i Zgjedhjeve thërret një mbledhje urgjente dhe miraton kërkesën e Gjinushit për të zëvendësuar emrin e kreut të PSD-së në fletën e votimit. Kundër kësaj vendimmarrjeje ka qenë kryetari i KQZ-së, Klement Zguri, i cili ka kujtuar se vendimi i Gjykatës do të kërkojë 15 ditë kohë që të marrë formë të prerë.

Por pavarësisht kësaj, katër anëtarët e PS-së në KQZ, Denar Biba, Bledar Skënderi, Edlira Jorgaqi dhe Rezarta Bitri vendosën të pranojnë në shkelje të ligjit kërkesën e Gjinushit për t’u çregjistruar si kryetar i PSD-së. KQZ-ja pranoi që pak orë pasi Gjykata kishte marrë një vendim për të ndryshuar emrin e drejtuesit të një subjekti politik, ta fusë atë çështje menjëherë në rendin e ditës dhe të dalë me një vendimmarrje. Duke pranuar një vendim gjykate, i cili s’ka marrë ende formë të prerë, KQZ-ja i ka hequr mundësinë çdo ankimuesi që të apelojë vendimin në Gjykatë. Në pikën 5 të vendimit të Gjykatës thuhet “Kundër këtij vendimi mund të bëhet ankim në Gjykatën e Apelit Tiranë brenda 15 ditëve, afat i cili për palën kërkuese fillon nga dita e nesërme e njoftimit të vendimit të arsyetuar”.

Shkeljet e Gjinushit

Vendimi gjyqësor i marrë në 06.06.2019 për të çregjistruar Skënder Gjinushin si kryetar të PSD-së tregon se zgjedhja e tij si kryetar i Akademisë së Shkencave në 24.05.2019 është bërë në shkelje flagrante të ligjit. Si drejtues i një subjekti politik, Skënder Gjinushi do të cilësohej i paligjshëm dhe si anëtar i Asamblesë në Akademinë e Shkencave dhe jo më të pretendonte të zgjidhej në krye të saj. Së dyti, pavarësisht deklarimit të tij publik, ligjërisht duke iu referuar vendimit të Gjykatës, Skënder Gjinushi ka bërë fushatë dhe është zgjedhur në krye të Akademisë së Shkencave, duke qenë ligjërisht kryetar i PSD-së.

Shkeljet me vendimin

1. Komisioni Qendror i Zgjedhjeve ka pranuar vendimin e Gjykatës së Tiranës përpara maturimit të tij, duke mohuar të drejtën e kundërshtimit të ankimuesve të mundshëm.

2. Skënder Gjinushi ka bërë fushatë dhe është zgjedhur në krye të Akademisë së Shkencave, duke qenë ligjërisht si kryetar i PSD-së.

3. Skënder Gjinushi si kryetar i PSD-së ka qenë anëtar i paligjshëm në Asamblenë e Akademisë së Shkencave/Panorama/