Zbulon “spiunin I.M.”, Berisha: Edi Rama urdhëroi Genta Sulën dhe Lindita Nikollën!
Ndonëse për kryetemë të javës, kryetari i Partisë Demokratike, Sali Berisha, kishte përcaktuar energjinë, pas kërcënimit të Kryeministrit Edi Rama për ndërprerje dhe rritje të çmimit, konferenca e përjavshme e vazhdoi aty ku e la çshtjen e Ilir Metës, Autoriteti për Informimin mbi Dokumentet e ish-Sigurimit të Shtetit, “Bashkëpunëtori I.M.”, dhe në fund siç iu servir nga kreu i këtij institucioni, Genta Sula, kryetares së Parlamentit të Shqipërisë, Lindita Nikolla, e cila e tronditur nxitoi dhe e hodhi në pazar politik, ku dhe u bë publike shkresa në të cilën thuhej se fjala është për “spiunin Ilir Meta!”
Gjithsesi, shqiptarët pasi e morën vesh se sa është çmimi i energjisë në bursë, sa i vjedhë Edi Rama dhe këtij të fundit iu bë e qartë se në rast se e rritë çmimin e energjisë do të përballet me revoltë popullore, Kryetari i PD, Sali Berisha zbuloi dhe identitetin i cili fshihet pas inicialeve të spiunit I.M.
“Pas verifikimit të dokumenteve unë deklarova dy ditë më parë që gjithçka është një trillim i paskrupullt i Edi Ramës dhe i turpshëm i një njeriu në panik, pa asnjë moral, që përdor shpifjen dhe trillimin kundër kundërshtarëve politikë. Dje pasdite dhe sot unë kam dokumentet në dorë. Nuk ka akt më të shëmtuar, Edi Rama bashkë me Shërbimin Informativ e ka bërë në mënyrën më të trashë këtë kurth. E ka stisur në mënyrën më të trashë. Cilido që lexon e-mail-in e ka të qartë se I. M. është Ilir Murati nga Librazhdi dhe Filip Tale është nga Librazhdi dhe s’ka asnjë lidhje me Ilir Rexhep Metën.
Këtë e kanë ditur këta. Edi Rama ka keqpërdorur, ka keqshfrytëzuar në mënyrë më të shpifur qoftë kryetaren e Autoritetit të Dosjeve, qoftë Lindita Nikollën. Unë mund t’ju them ju, në dokumentin që Genta Sula i drejton Linda Nikollës, akuzon direkt Ilir Metën për bashkëpunëtor të Sigurimit të Shtetit. Një akt i pashembullt. Kjo zonjë është keqshfrytëzuar në mënyrë ekstreme nga Edi Rama për arsye që ajo i di vetë dhe do të zbardhen. Mbi bazën e këtij dokumenti të hartuar në SHIK, për herë të parë në jetën e saj politike Linda del dhe u thotë shqiptarëve se jam e tronditur nga dokumenti që ka dalë. Histori të turpshme, zyrtarë primitivë që s’kanë asgjë të përbashkët me integritetin e një zyrtari. Ky është kurthi që organizon Edi Rama në mënyrë që të përdor SHISH-in për fabrikim dokumentesh,” th a Sali Berisha duke shtuar se se po të mos ishte Edi Rama ai që urdhëronte Genta Sulën dhe Lindën e Parlamentit kishte një shteg ligjor të plotë.
“Në vitin 1995 këtu është miratuar ligji i lustracionit, i hartuar nga presidenti Havel. Sali Berisha e ka marrë atë ligj e ka përkthyer fjalë për fjalë dhe e ka çuar në parlamentin shqiptar. Ai ligj kishte lustracionin. U zbatua. Ilir Meta mori certifikatën, të cilën po të mos e meritonte nuk do ta merrte kurrë. Socialistët erdhën në pushtet, ligjin e mbajtën, hoqën lustracionin dhe parlamenti ka pasur me dhjetëra bashkëpunëtorë të sigurimit të shtetit dhe është drejtuar nga bashkëpunëtorë të sigurimit të shtetit.
Erdhëm në pushtet, në vitin 2008 dorëzova përsëri të njëjtin ligj në parlament, e votuam, përsëri lustracionin. Ligjin e rrëzoi tërësisht Gjykata Kushtetuese, për mendimin tim në mënyrë të padrejtë.
Në vitin 2012 PD përsëri dërgoi amendamentet e lustracionit, Edi Rama dhe PS i kundërshtoi në mënyrë kategorike.
Tani, po të mos ishte Edi Rama ai që urdhëronte Genta Sulën dhe Lindën e Parlamentit kishte një shteg ligjor të plotë. Në qoftë se ligji i lustracionit nuk ekziston, ekziston ligji i dënimit të krimeve të komunizmit. Sipas këtij ligji, çdo qytetar ka të drejtë të çojë në gjykatë, ekzekutorin, persekutorin e tij dhe ky ligj është në fuqi. Këto dy zonja po të mos merrnin përsipër të bënin rolin e të keqpërdorurave in exstremis nga Rama kishin tagër t’i thoshin qytetarit shko në gjykatë, denonco Ilir Metën. Po kjo nuk i interesonte sepse Filip Talen nuk e kishte persekutuar Ilir Meta.
Unë jam për ligjin e lustracionit, por ka një vendim Gjykate kushtetuese që e ka rrëzuar. Ne e bëmë provën në 2015 dhe e refuzuan. Gjithçka është një përpjekje për të keqpërdorur Shërbimin Informativ kundër kundërshtarëve politikë. Linda dhe Genta janë thjesht fatkeqet e Ramës që kanë lejuar të përdoren nga Rama,” Kryetari i PD, Sali Berisha duke shtuar se ngrihet shteti në këmbë për këtë gjë për të heqë vëmendjen nga afera që ka kryer, nga inceneratorët, nga ndërtimi i rrugëve, nga PPP-të, afera e portit të Durrësit ndërsa përfundoi:
“Kjo ngrehinë është e kalbur, do të bjerë. E ndjeni se sa i desikulibruar është ai, parlamenti i është bërë ferr.
Kam qenë dhe ngelem për lustracionin. Por ka qenë Edi Rama që zgjodhi modelin gjerman. Nëse e keni dëgjuar në studio, ai me mburrje të madhe thotë; ne i hapëm dosjet, dhe Berisha jo. Ne hapëm dosjet për ata që kandidonim, por dhe për ata që do të donin të dinin. Pazar me dosjet nuk bëhen. Ka direktiva nga Strasburgu. Autoritetet gjermane kanë të njëjtin model.”
Ndërkohë, personi i goditur Ish-Presidenti Ilir Meta tani në krye të Partisë së Lirisë, tha se Autoriteti për Informimin mbi Dokumentet e ish-Sigurimit të Shtetit, do të mbajë përgjegjësi për gjithçka ndodhi me lojërat lidhur me këtë dosje.
