S’ndryshon vendimi i KPK, KPA shkarkon Prokurorin e Tiranës, Adnand Xhelili

Kolegji i Posaçëm i Apelimit, KPA, ka lënë në fuqi vendimin e Komisionit të Pavarur të Kualifikimit, KPK, duke shkarkuar prokurorin e Prokurorisë së Rrethit Gjyqësor Tiranë, Adnan Xhelili.

Duke shpallur vendimin kryesuesja e trupit gjykues, Ina Rama, vuri në dukje se Kolegji kishte dalë në të njëjtat përfundime si KPK në lidhje me pasuritë e Xhelilit. Rama tha se ish-prokurori ishte gjetur në mungesë të ardhurash të ligjshme në disa raste, kryesisht në transaksionet për shtëpitë në Tiranë dhe Borsh.

Xhelili i kishte kërkuar trupit gjykues kthimin e tij në detyrë, duke këmbëngulur se veç shkeljeve procedurale KPK nuk kishte arritur në përfundimin e duhur.

Ankimi në KPA u shqyrtua nga trupa gjykuese e përbërë nga gjyqtarja Ina Rama si kryesuese, Sokol Çomo relator, si dhe Rezarta Schuetz, Natasha Mulaj dhe Albana Shtylla anëtare.