Zgjedhja e Presidentit, Abdixhiku: LDK mund të propozojë një kandidat, mund të jetë edhe Osmani!

Kryetari i Lidhjes Demokratike të Kosovës, LDK, Lumir Abdixhiku, është shprehur i gatshëm për marrëveshje politike me Lëvizjen Vetëvendosje, LVV, e cila do të mund t’i hapte rrugë edhe zgjedhjes së presidentit të ri.

Lumir Abdixhiku tha se nuk i kanë tre emra për president, por mund ta kenë një, e këtu nuk e përjashtoi mundësinë që ai emër të jetë, Vjosa Osmani.

“Më lejoni të shpreh habinë se si çështja kaq e rëndësishme komunikohet në distancë dhe përmes rrjeteve sociale. Mendoj se është temë serioze. Me aq sa kuptuam, Kurti po i kërkon 90 vota. LDK nuk mund t’i bëjë aq. Këtë herë ai nuk mundet pa PDK-në. Nëse kishte dashur vetëm me LDK-në, le të mblidhen, le t’i bëjnë 78 vota, nëse mbesin te votat e LDK-së, ulemi dhe flasim,” Kryetari i Lidhjes Demokratike të Kosovës, Lumir Abdixhiku, duke u shprehur qartë:

“LDK mund të propozojë emra. Ne mund të propozojmë një. Mundet me qenë edhe Vjosa Osmani. Duhet të vendosë a po do marrëveshje me LDK-në, apo po i do 90 vota. Propozimi ynë gjithmonë ka qenë marrëveshja politike. Jo tre emra, por e japim një.”

Ndryshe, sot Lideri i Lëvizjes Vetëvendosje dhe Kryeministri i Kosovës, Albin Kurti, duke dhënë dhe ofertën që u kosniderua si e fundit, tha se pret nga dy partitë opozitare, PDK dhe LDK, të nxjerrin tre emra jashtë skenës aktuale politike për President, dhe të zhbllokohet situata meqenëse, sipas tij, edhe një palë zgjedhje të reja nuk sjellin zgjidhje, dhe, një palë zgjedhje të reja i humbin Kosovës së paku 10 milionë euro për organizimin e tyre dhe dhjetëra miliona të tjerë që do të ishin financim nga bashkësia ndërkombëtare.