Zgjedhjet e 30 Qershorit në Venecia, Gjykata Kushtetuese pezullon gjykimin

Gjykata Kushtetuese ka pezulluar gjykimin për padinë e Voltana Ademit për zgjedhjet e 30 qershorit 2019 dhe ka vendosur ti drejtohet Komisionit të Venecias për opinion në mënyrë që të marrë vendimin.

Gjykata Kushtetuese u ka lënë afat 7 palëve të përfshira në padinë e Voltana Ademit për zgjedhjet e 30 qershorit të 2019, që deri më 25 Qershor të bëjnë nga një pyetje për t’ia çuar Komisionit të Venecias.

Pas këtij vendimi, pala paditëse me në krye Voltana Ademin është shprehur optimiste se Gjykata Kushtetuese do e pranojë kërkesën e Shoqatës së Bashkive dhe do të rrëzojë zgjedhjet e 30 qershorit të 2019.

Kur do të merret vendimi për këtë çështje tashmë nuk varet as nga Reforma në Drejtësi dhe as nga Gjykata Kushtetuese por nga koha e shqyrtimit nga Komisioni i Venecias.

Filloi me dy kundërshtime ndaj Qeverisë

Me fillimin e seancës për zgjedhjet e 30 qershorit 2019 në Gjykatën Kushtetuese u konfirmua arsyeja pse Kryeministri Edi Rama përmes kamikazit Pjerin Ndreu shkarkoi Voltana Ademin nga Kryetarja e Shoqatës së Bashkive të Shqipërisë, por Përfaqësuesja e Qeverisë, Edlira Kokona, nuk arriti të bindë Kushtetuesen pse duhet të pezulloj gjykimin deri në pritje të përfundimit të gjykimit të çështjes në Gjykatën e Tiranës, ku do të konfirmohet statusi i Voltana Ademit si kryetare e SHBSH.

Gjykata Kushtetuese, gjithashtu rrëzoi edhe kërkesën për pushim të çështjes që lidhet me legjitimimin e kërkuesit duke theksuar se do ta japë vendimin bashkë me vendimin përfundimtar ndërsa iu la një orë kohë palëve për t’u njohur me aktet e dosjes.

Angazhimi i Qeverisë në këtë çështje kaloi edhe në bezdi ku edhe Shoqata Autonomi Vendore kërkoi që të bëhej pjesë e procesit si palë e interesuar, por ngeli vetëm dëshirë e levave të Edi Ramës.

“Nuk na është vënë në dispozicion statuti i Shoqatës së Bashkive. Kërkojmë kopjen e prokurës për zonjën Ademi si përfaqësuese e Shoqatës. Këshilli i Ministrave kërkon pezullimin e çështjes, derisa gjykata e Tiranës të shprehet për organet drejtuesve te shoqatës. Kërkojmë pushimin e gjykimit për shkak të juridiksionit të gjykatës kushtetuese. Për aq kohë sa është pranuar shoqata e bashkive, duhet të pranohet edhe shoqata e autonomisë vendore,” tha Edlira Kokona pa e kuptuar as veten e vetë se çfarë dëshiron, por Këshilltari i Presidentit të Republikës, Bledar Dervishi, sqaroi pse Edi Rama tenton ta uzurpoi Shoqatën e Bashkive.

“Shoqata tjetër e Bashkive ka pasur tendencë jo vetëm të ushtrojë funksionin e saj, por edhe të largojë nga drejtimi përfaqësuesit e kësaj shoqate. Qëllimi ka qenë që të uzurpojnë këtë shoqatë. Unë kërkoj që të rrëzohet kërkesa që ajo shoqatë të bëhet pjesë e këtij procesi. Këshilli i Ministrave kërkon pezullim të çështjes, derisa gjykata e Tiranës të shprehet sa i takon organeve drejtuese të shoqatës. Gjithashtu kërkojnë pushim të gjykimit, pasi nuk ka kompetencë për këtë çështje,” tha Dervishi duke i bërë favor edhe Shoqatës së themeluar nga Rama:

“Të dy shoqatat kanë të drejtë të jenë pjesë e këtij procesi.”

Por përfaqësuesi i Shoqatës së Bashkive me kryetaren legjitime Voltana Ademi, Jordan Daci, tha se nuk duhet të marrë pjesë si subjekt i interesuar, pasi janë në konflikt interesi.

“I kërkojmë Gjykatës Kushtetuese që mos ta pranojë pasi është jashtë afateve. Këshilli i Minstrave nuk mund të jetë palë e interesuar, pasi pushteti lokal është i pavarur. Edhe avokatura e shtetit, nuk mund të jetë palë në këtë proces, pasi i shërben gjithë shtetit dhe nuk mund të përfshihet.”

Pas një ore…

Gjykata Kushtetuese ka rifilluar seancën për zgjedhjet lokale të 30 qershorit pas rreth 4 orë ndërprerjeje, kohë sa palët u njohën me aktet e Dosjes,.

Përfaqësuesja e Parlamentit, Mimoza Arbi, tha në seancë se kërkuesi nuk ka legjitimitet për kërkesën.

”Deputetët çmuan se Presidenti me dekretin për anulimin e zgjedhjeve është në shkelje të Kushtetutës. Deputetët nënvizuan se Presidenti ka kryer shkelje të Kushtetutës,” tha Arbi duke shtuar se Gjykata Kushtetuese nuk ka juridiksion të shqyrtojë çështje që lidhen me proceset zgjedhore.