Zgjedhjet në PD, ja fituesit në degë…

Bazuar në urdhrin e firmosur nga kryetari i Partisë Demokratike, Lulzim Basha, degët e PD në të gjithë vendin kanë thirrur Kuvendet Zgjedhore për të përzgjedhur krerët e degëve të PD-së.

Këtë fundjavë, Partia Demokratike ka përzgjedhur kryetarët e degëve lokale në disa prej qyteteve kryesore në vend.

Në degët kryesore në të gjithë vendin janë rikonfirmuar kryetarët aktualë, ndërkohë që procesi do të vijojë gjatë ditës së sotme dhe fundjavën e ardhshme.

Në zgjedhjet e zhvilluara për kreun e PD-së në Fier, është rizgjedhur deputeti i PD, Luan Baçi. Pas zgjedhjes Baçi tha se do të vijojë të drejtojë degën e PD-së në Fier, pavarësisht faktit se ka mandatin e deputetit, duke theksuar se rezultatet e zgjedhjeve të fundit, pavarësisht manipulimeve, kanë sjellë rezultate të kënaqshme.

Një mandat të ri në krye të PD-së në Kamzë ka marrë edhe kryebashkiaku i Kamzës, Xhelal Mziu, ashtu si edhe Hariz Mema në Sarandë e Buja Vreto në Librazhd.

Zgjedhjet në degët e PD

Fier – Luan Baçi

Lushnje – Myslim Murrizi

Gjirokastër – Dasho Aliko

Sarandë – Hariz Mema

Korçë – Andrea Bano

Kamzë – Xhelal Mziu

Malësi e Madhe – Anton Kokaj

Librazhd – Bujar Vreto

Gramsh – Kodhel Cala

Dibër – Naim Gazidede

Bulqizë – Dëfrim Fiku

Maliq – Donald Kulla

Belsh – Bedri Qypi

Devoll – Arben Miza

Këlcyrë – Luan Malko

Shijak – Rezart Tusha

Kurbin – Behar Haxhiu

Durrës – Ferdinand Xhaferaj

Ndryshe, në kuadër të riorganizimit të Partisë Demokratike, Lulzim Basha firmosi urdhrin për strukturat, duke i kërkuar grupit të punës që do të organizojë zgjedhjet, të mbështesë kandidatët dhe t’i sigurojë atyre akses të barabartë.

“Grupi i Punës mbështet kandidatët dhe i siguron akses të barabartë të tyre në: Listat e anëtarësisë. Prezencën e përfaqësuesve të kandidatëve në komisionin e votimit. Prezencën e përfaqësuesve të kandidatëve në procesin e numërimit të votave dhe shpalljen e rezultatit,” theksohet në udhëzimin e firmosur nga Lulzim Basha për zgjedhjet për drejtues lokalë të PD-së që duhet të zhvillohet në periudhën 23 nëntor – 2 dhjetor.

Javën e ardhshme pritet të zgjedhen kryetarët në disa degë kryesore të vendit, përfshirë edhe krerët e degëve në Tiranë. Në përfundim të këtij procesi do të përzgjedhet edhe figura qendrore për qytetin e Tiranës, i cili do të koordinojë dhe organizojë demokratët në kryeqytet.