Zhgënjyese, Ambasada e SHBA: Klima e biznesit pengon rritjen e investimeve të huaja

Pasi Gjykata Administrative vendosi të pranojë padinë e shoqërisë ADFD për zonën e dyqaneve “Duty free” në Rinas duke rrëzuar urdhrin e Ministrisë së Financave që i anuloi lejen e shfrytëzimit për 5 vjet të tjera të Duty Free në Rinas nga ADFD, reagon Ambasada e SHBA në Tiranë duke e konsideruar zhgënjyes faktin që klima aktuale e biznesit pengon rritjen e investimeve të huaja.

“Është zhgënjyese që klima aktuale e biznesit pengon rritjen e investimeve të huaja. Shqipëria duhet të zbatojë rregulla të drejta dhe transparente në mënyrë të barabartë për të gjitha bizneset,” thekson Ambasada e SHBA në reagimin e saj përmes rrjetit social Facebook duke përfunduar:

“Shpresojmë që qeveria e Shqipërisë të shqyrtojë seriozisht sfidat në mjedisin aktual dhe të zbatojë ndryshime të prekshme, për të tërhequr investimet e huaja shumë të nevojshme.”

Ndryshe, prej korrikut të vitit të kaluar, kur nënshkroi dhe kontratën me Tirana International Airport (TIA) shoqërinë që administron aeroportin e Tiranës, kompania amerikane nuk ka mundur të marrë në zotërim zonën e dyqaneve “duty free”.