Zhvillimi urban dhe turizmi, ende pa disbursuar 68 mln $, bilanci i projektit të Bankës Botërore
Zhvillimi i integruar urban dhe turizmi është një nga projektet kryesorë që Banka Botërore po mbështet në vendin tonë duke miratuar ende pa mbyllur paketën e parë një paketë të dytë.
Në një vlerësim të ecurisë së projektit që ka një vlerë totale mbi 105 milionë $, Banka ka bërë një bilanc të punimeve të përfunduar dhe atyre në proces. Konkretisht deri më tani janë disburusar 38 milionë dollarë teksa mbetet ende e padisbursuar shumica e fondeve.
I planifikuar për t’u mbyllur në korrik të vitit të shkuar Banka Botërore pranoi shtyrjen për në korrik 2025 duke miratuar një paketë shtesë në projektin origjinal. Por cila është ecuria e komponentëve të projektit deri më tani.
Banka vlerëson se në komponentin e parë kanë përfunduar punimet civile të rrugës me kalldrëm të këmbësoreve tek Kalaja e Beratit dhe rrugët e aksesit të mjeteve, shëtitorja dhe shkallët e Sarandës, përmirësimi urban dhe ndriçimi i integruar në Përmet, rruga me kalldrëm e Pazarit të Gjirokastrës, sistemi i Muzeve dhe punimet rehabilituese në kalanë e Gjirokastrës.
Punimet civile të përmirësimit të integruar urban në Berat po realizohen ndërsa konsulenca e projektimit për përmirësimin e integruar urban në Sarandë dhe Gjirokastër është finalizuar dhe janë kontraktuar punimet civile.
“Komponenti 2. Kanë filluar punimet për përmirësimin e zonave turistike të Benjës dhe pikave panoramike përgjatë korridorit turistik, projektimi për përmirësimin e zonës turistike të Zvërnecit është finalizuar dhe janë kontraktuar punimet civile; konsulenca e projektimit për vendet turistike si Kalaja e Gjirokastrës Kalaja e Borshit, Kalaja e Kaninës dhe Shpella e Spillesë janë në zbatim.
Komponenti 3. Konsulenca për Strategjinë e Kërkimit dhe Zhvillimit të Tregut ka përfunduar. Shërbimet e konsulencës për Partneritetet e Menaxhimit të Destinacionit, Zhvillimi i Tregut për Jugun e Shqipërisë Paketa 1, dhe Zhvillimi i Produkteve Turistike dhe Sistemi i Statistikave të Turizmit aktualisht janë në zbatim.
Ka përfunduar prokurimi për konsulencën për paketën 2 të zhvillimit të produkteve turistike” thuhet në dokumentin e bankës të bërë tashmë publik në faqen e saj./Monitor/
