Zjarret në Atika, publikohen fotot dhe emrat e personave që rezultojnë të zhdukur

Një grup grekësh kanë krijuar një bazë të dhënash elektronike me fotografitë dhe emrat e personave që rezultojnë të zhdukur pas zjarreve shkatërruese të së hënës në lindje të Athinës.

Deri të martën pasdite rezultojnë të humbur 25 persona, emrat dhe fotot e të cilave janë ngarkuar në bazën e të dhënave.

Autoritetet greke po inkurajojnë miqtë dhe të afërmit e personave që ndodhedhin në zonë dhe që ende nuk janë gjetur, që të japin detaje në Shërbimin e Zjarrfikësve, duke telefonuar numrin 199.

Megjithatë, shumë ankohen se thirrjet e tyre po devijohen në agjenci të tjera.

Më parë, Shërbimi Zjarrfikës njoftoi se numri i përgjithshëm i të vdekurve është rritur në 74.

Të plagosurit janë 188, përfshirë 23 fëmijë.