Vasili i përgjigjet zv.ambasadorit amerikan: Ka diplomatë që vuajnë nga një amnezi kritike…

Petrit Vasili, Kreu i Grupit Parlamentar të LSI-së, ka reaguar lidhur me një deklaratë të zv.ambasadorit amerikan në Tiranë, që shprehu ktitika ndaj politikës shqiptare përsa i takon mosmiratimit në seancën e fundit të Kuvendit të ligjit të Magjistraturës.

“Megjithëse mungesa e Gjykatës Kushtetuese është e një rëndësie kritike, ka diplomatë të huaj që vuajnë nga një amnezi (harrese) kritike dhe vazhdojnë të flasin me një këmbëngulje artificiale, të pavend dhe te sforcuar për ligjin e magjistraturës, i cili s’ka aspak te beje me zgjidhjen e kryeçështjes së prerjes së kokës së sistemit të drejtësisë”, shkruan Vasili në një postim në rrjet.

I ngarkuari me punë në ambasadën e Shteteve të Bashkuara në Tiranë David Muniz, e konsideroi “një dështim i të gjitha partive në parlament”, moskalimin dje në seancën e fundit të parlamentit për këtë sesion, të ndryshimeve ligjore që do të sillnin zhbllokimin e regjistrimit të studentëve të rinj për këtë vit akademik në Shkollën e Magjistraturës dhe emërimin e të porsadiplomuarve.