ZRRE: Nuk do të ketë shtrenjtim të energjisë në Kosovë

Zyra e Rregullatorit për Energji, ZRRE, bëri të ditur se nuk ka rritje të çmimit të energjisë në Kosovë. Kompania Kosovare për Furnizim me Energji Elektrike, KESCO, kishte kërkuar shtrenjtimin e tarifave të energjisë deri në 88 për qind për  konsumatorët familjarë dhe deri në 70 për qind për bizneset.

Zyra e Rregullatorit për Energji, ZRRE, i ka kthyer përgjigje negative kompanisë Kosovare për Furnizim me Energji Elektrike, KESCO, pas kërkesës për shtrenjtim të energji elektrike deri në 88 për qind.

Kjo vjen pasi Qeveria ka vendosur për ndarje të subvencionit me të cilën kanë pushuar rrethanat për Shqyrtim të Jashtëzakonshëm të të Hyrave të Lejuara Maksimale të FSHU-së, respektivisht të tarifave të energjisë elektrike për konsumatorët me të drejtë të Shërbimit Universal.

“Me vendimin e Qeverisë së Kosovës të datës 24.08.2022, për ndarjen e subvencionit kanë pushuar rrethanat për Shqyrtim të Jashtëzakonshëm të të Hyrave të Lejuara Maksimale të FSHU-së, respektivisht të tarifave të energjisë elektrike për konsumatorët me të drejtë të Shërbimit Universal”.

Zyra e Rregullatorit për Energji, ZRRE, më datë 9 gusht 2022 ka pranuar aplikimin për Shqyrtim të Jashtëzakonshëm të të Hyrave të Lejuara Maksimale për Furnizuesin me Shërbim Universal, FSHU.

Ndër të tjera, në kërkesën e saj FSHU thekson se në mungesë të rimbursimit të mjeteve të subvencionit nga Qeveria e Republikës së Kosovës të shumës prej 32.8milion eurove për periudhën 9 shkurt – 30 qershor 2022 është tejkaluar pragu i materialitetit prej 5% siç përcaktohet në Rregullën e të Hyrave të FSHU-së, duke mundësuar kështu hapjen e shqyrtimit të jashtëzakonshëm.

ZRRE në përputhje me Rregullën për Përcaktimin e të Hyrave të Lejuara për FSHU-në, ka analizuar me kujdes aplikacionin e FSHU-së, dhe konstaton se ngjarja e jashtëzakonshme nuk ka qenë nën kontrollin e FSHU-së, dhe se mungesa e subvencionit të Qeverisë së Kosovës do të tejkalonte pragun e materialitetit prej 5% në të Hyrat e Lejuara Maksimale të FSHU-së, e cila do të hapte shqyrtimin e jashtëzakonshëm të tarifave për konsumatorët që gëzojnë të drejtën e shërbimit universal.

Qeveria e Kosovës më 24 gusht ka aprovuar kërkesën e Ministrisë së Ekonomisë për ndarje buxhetore në shumë prej 41 milion euro lidhur me Pakon e Ringjalljes Ekonomike për zbatimin e Masës 3.7 – Mbështetje në tejkalimin e krizës energjetike.

ZRRE thotë se gjatë muajve në vazhdim, do të monitorojë nga afër gjendjen e kostove të sektorit të rregulluar të energjisë elektrike dhe do të ndërmarrë hapat e nevojshëm në përputhje me mandatin mandatit e saj ligjor.

Kompania Kosovare për Furnizim me Energji Elektrike, KESCO, kishte dorëzuar më 12 gusht në Zyrën e Rregullatorit të Energjisë, ZRRE, një propozim për tarifa të reja të energjisë elektrike, i cili do të shtrenjtonte rrymën deri në 88 për qind për konsumatorët familjarë dhe deri në 70 për qind për bizneset.

Sipas kësaj kërkese tarifa e ulët për ata që shpenzojnë nën 800 kilovat në orë, nga 2.89 centë është propozuar të bëhet 5 e 43, ndërsa e larta për këta konsumatorë nga 6.75 në 12.86.

Ndërsa, për ata që shpenzojnë mbi 800 kilovat, është propozuar që tarifa e ulët të bëhet nga 5.90 në 11.09, derisa e larta nga 12.52 në 23.53.

Kurse, që nga 15 gushti qytetarët e Kosovës janë duke u përballur me reduktimet e rrymës, si pasojë e rënies së blloqeve të termocentraleve në Obiliq, por edhe krizës me energji elektrike. Krahas territ, qytetarë e kanë hallin se si të sigurojnë ngrohjen për këtë dimër.

Në fillim të këtij muaji, deputetët e Parlamentit të Kosovës me 68 vota për, asnjë kundër e abstenim kanë votuar vendimin e Qeverisë për vendosjen e masave emergjente në furnizimin me energji elektrike.

Këto masa do të mbesin aktive për 60 ditë.

“Masat e marra do të mbesin në fuqi për 60 (gjashtëdhjetë) ditë pas aprovimit nga Parlamenti i Kosovës. Parlamenti mund të vazhdojë këtë afat për periudha të njëpasnjëshme prej 30 (tridhjetë) ditësh me shumicë të votave të deputetëve të Parlamentit të pranishëm në seancë, deri në 180 (njëqind e tetëdhjetë) ditë”./Monitor/