1.3 ton kokainë me banane në Shkup, “nën kujdesin” e SPAK kaloi nëpër Shqipëri

Sot në Shkup të Maqedonisë së Veriut u zbuluan dhe kapën 1.3 ton kokainë ndërkohë mësohet se operacioni kishte nisur dje kur Italia kishte zëvendësuar ngarkesën me lëndë tjetër, ngarkesa “e rreme” në Tivar të Malit të Zi kishte shkuar me GPS kurse në Shqipëri u sinjalizua SPAK.

Prokuroria e Posaçme filloi menjëherë procedimin, raporton BW, për të konfirmuar nëse kjo ngarkesë ishte e destinuar për në Shqipëri apo ndonjë vend tjetër.

Prej Tivarit, kokaina me një kamion bananesh kaloi pa problem Pikën Kufitare të Hanit të Hotit për të hyrë në Shqipëri, dhe më pas për të dalë nga Qafë Thana për në Maqedoninë e Veriut.

Sot u bë e mundur zbulimi i destinacionit i cili ishte një magazinë frutash afër Shkupit dhe deri tani janë arrestuar dy shoferë si dhe një magazinier.

Ndryshe, në aksion për kapjen e kokainës kanë marrë pjesë DEA amerikane, Guardia di Finanza, policia shqiptare dhe policitë e disa vendeve të tjera. Lënda narkotike u zbulua mbrëmjen e sotme në një magazinë frutash, në Krushopek të Sarajit, ndërsa deri më tani kanë rënë në pranga tre persona, dy shoferë dhe një magazinier, që punonin në këtë magazinë.