21 vjetori i vrasjes, LDK përkujton Enver Malokun

Në përvjetorin e 21-të të vrasjes, anëtarë të Kryesisë, deputetë, kryetarë të degëve dhe aktivistë të LDK-së kanë bërë homazhe te lapidari i Enver Malokut, në nderim të jetës dhe veprës së tij.

Ndërkohë Kryetari i LDK-së, Isa Mustafa, duke përkujtuar Enver Malokun, në 21 vjetorin e vrasjes, tha se ishte meritë e tij që në kohë të okupimit të egër serb e luftës së ashpër, Qendra për Informim e Kosovës, që ai drejtoi, punoi si kurrë më parë në histori, në informimin dhe sensibilizimin e opinionit ndërkombëtar.

“Sot, kujtojmë njërën nga figurat kolosale të LDK-së, intelektualin dhe zërin e lirisë, Enver Maloku. Kontributi i Enverit, si drejtues i Qendrës për Informim e Kosovës ishte i pazëvendësueshëm. Ishte meritë e Enver Malokut, që në kohë të okupimit të egër serb e luftës së ashpër, fjala u shqiptua guximshëm e pacenueshëm dhe institucioni që drejtoi ai, punoi si kurrë më parë në histori, në informimin dhe sensibilizimin e opinionit ndërkombëtar për krimet që po ndodhnin në Kosovën e viteve të 90-a,” thekson Isa Mustafa përmes rrjetit social Facebook, punë kjo fisnike e atdhetare që po ia zinte rrugën qarqeve antishqiptare.

“Edhe pas dy dekadave, vrasja e Enver Malokut mbetet e pandriçuar dhe Lidhja Demokratike e Kosovës, kërkon me ngulm që secila vrasje e veprimtarëve të LDK-së, të zbardhet deri në fund,” thekson Kryetari i LDK, Isa Mustafa duke përfunduar:

I përjetshëm kujtimi, për Heroin e Kosovës, Enver Malokun!

Ndryshe, më 11 janar 1999, drejtuesi i Qendrës për Informim të Kosovës, Enver Maloku,u vra tinëzisht pranë banesës së tij, në prani të familjes.