22 vite pa Azem Hajdarin, Basha: Vepra e tij, dëshmi se askush nuk mund ta ndalë dëshirën për ndryshim

Vepra dhe sakrifica e Azem Hajdarit është përjetë shembull frymëzimi, për të çuar deri në fund idealin e një Shqipërie Europiane, të një Shqipërie demokratike ku qytetarët janë zot të fateve të tyre, u shpreh Kryetari i Partisë Demokratike, Lulzim Basha, në përvjetorin e vrasjes së heroit të demokracisë Azem Hajdari, duke kujtuar me nderim dhe respekt të thellë jetën dhe veprën e njeriut, që ia fali rininë dhe energjinë e tij demokracisë dhe lirisë:

“E sotmja është po ashtu një thirrje për rininë që të mos shohin ikjen si zgjidhje, por përballjen dhe fitoren, ashtu siç bëri Azem Hajdari në dhjetorin e 1990 e në vitet që pasuan,” tha Lulzim Basha pasi bëri homazhe në Memorialin e Heroit të Demokracisë, Azem Hajdari.

Vepra e Azem Hajdarit është dëshmia e qartë se askush dhe asgjë nuk mund ta ndalë dëshirën, energjinë dhe vendosmërinë e rinisë por edhe të popullit shqiptar për ndryshim, tha në këtë përvjetor Kryetari i Partisë Demokratike, Lulzim Basha, duke shtuar se është koha që me frymëzimin e Azemit dhe bashkëluftëtarëve të tij të viteve ’90, të hapim rrugën e lirisë, demokracisë, mundësive të barabarta, Shqipërisë si gjithë Europa.

“I përjetshëm qoftë kujtimi i heroit të demokracisë, simbolit të luftës dhe përpjekjeve për ta bërë Shqipërinë një vend më të mirë.”